Is casteddaius funt cuntentus meda de biviri in sa citadi insoru. Aici meda ca sa cuntentesa lompit a su 90% e fait de sa capitali sarda una de is citadis italianas aunia, chini ddue bivit, ndi boddint sa calidadi arta de sa vida, paris a Trento, Trieste, Bergamo, Brescia e Boltzanu.
Est cantu ndi bessit a pigliu de s’urtima cica “Quality of life in European cities”, de sa comissioni Europea cun s’agiudu de s’Istat.
Una de is cosas chi pragit de prus a is casteddaius est ca in citadi s’agatant logus “birdis” comenti de parcus e giardinus po passai su tempus in foras. Totu custu fait cuntentus s’80% de is bividoris de sa citadi. Cussu chi, invecias, no andat po nudda a geniu funt is servitzius sanitarius: difatis sa percentuali est intru su 30 e su 40%.
Finas is servitzius culturalis, comenti de aposentus po sa musica, tiatrus, museus e bibliotecas acuntentant is citadinus.
In prus de Casteddu, sa cica pigat in cunsideru, intru de is citadis sardas, finas Tatari. Po sa citadi de su nord Sardigna sa cica amostat comenti sa cuntentesa de ddue biviri de is tataresus non giumpit s’81% e ponit in pumus artus finas ca is bividoris narant ca sa calidadi de sa vida de sa matessi Tatari s’est abasciada massiamenti in is urtimus cinc’annus. Est a nai ca comenti in Casteddu e totu finas is tataresus non s’allirgant po nudda candu si fueddat de is servitzius sanitarius e de su trasportu pubricu.
Ambos, perou, narant ca sa calidadi de s’aria in is citadis insoru est bona meda.
Donendu una mirada a is atras citadis italianas, pigadas in cunsideru cun sa cica de sa Comissioni Europea, si podit biri ca is citadinus prus cunetentus de sa calidadi de vida de sa propriu citadi funt is trentinus. Est finas a nai ca Trento est una de is primas citadis finas in totu s’orrestu de s’Europa. In su mentris is citadinus prus pagu cuntentus, in Italia, funt is tatantinus, chi est s’urtima ciatdi intru de is bintises citadis pigadas in cunsideru.
Màuru Mura
Mercuris, su cincu de làmpadas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.comune.cagliari.it/portale/page/it/parco_giovanni_paolo_ii?contentId=LGO12349
