“No, no apu firmau”. Ddu at nau su “leader” de is Steddaus Giuespu Conte in San Nicandro Garganico, in sa provincia de Foggia, arrespundendu a is giornalistas chi pregontaiant chi iat postu su nomini in pissu de su referendus po sa “cannabis libera”, chi eriseru est lompiu a is cincucentu mila firmas chi serbiant po votai in su beranu de ocannu chi benit.
Su presidenti beciu de su Guvernu, chi s’agatat in sa bidda de sa Puglia po cicai de augiudai Mateu Vocale, chi currit po diventai sindigu, at finas chistionau de politiga italiana.
“Non soi pensendu de mi presentai po diventai un’atera borta presidenti de su Consigliu, aici comenti non seus pensendu a perun’atru. Su Guvernu ddu teneus giai e nosu depeus trabagliai, cun responsabilidadi, po cicai de donai s’agiudu nosu in cust’ora de sa vida politica e istitutzionali de s’Italia”, at nau, fueddendu de un’atobiu, in su benidori, cun su segretariu de su Partidu Democratigu Erricu Letta.
“Teneus unu presidenti de su Guvernu chi si tzerriat Mariu Draghi – at aciuntu – . Nosu, comenti de Steddaus, ddu agiudaus cun cuscientzia e responsabilidadi poita su guvernu possat fairi de totu in su interessu de totu is italianus”.
In segus si dd’at pigada cun sa Lega de Mateu Salvini: “Sa spera est chi sa Lega, in certas chistionis, cumprendat ca est unu partidu de Guvernu e dd’acabit de pensai sempiri a is votus. A bortas tocat a umperai su ciorbeddu e non feti s’entiri!”. “Lassaus perdiri ca in donnia a is segretarius erribint is percentualis de is cicas de agradessimentu e nde ddus pesant chena di fairi tocai sa terra cun is peis. Su problema, in beridadi, est chi imoi nosu seus trabagliendu cun sa Lega puru e aici depint fairi cussus puru. Candu unu si pigat s’impignu de cumandai, est craru a totus chi tocat trabagliai in s’interessu de su Stadu e non a pensai a atru”.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://m.facebook.com/GiuseppeConte64/photos/a.385574775257827/1261301837685112/
