A pustis airi fatu connosciri sa magligedda de dus e de tres, cussas chi ant essi bestias in is partidas foras de domu, su Casteddu at amostau cussa, in coloros orrubius e asulus, chi, invecias, at essi umperada massimamenti in is partidas chi s’ant a giogai in s’Unipol Domus. Sa borta de unu at essi lunis candu at a cumentzai in manera uficiali sa stagioni 2024-2025 cun sa prima partida de sa Coppa Italia contras de sa Carrarese, scuadra chi ocannu passau est bessia de sa serie C a sa serie B, a pustis is play off.
Sa maglia de domu, produsia po su de tres annus de sighiu de s’azienda sarda Eye Sport, arregodat a is tifosus s’identidadi de s’Isula ca si ddue agatat s’aneddu de coja sardu, chi est una de is prendas prus famadas de totu sa Sardigna.
“Coru e Fidi” est su nomini cun sa cali est batiada sa maglia, a pustis chi sa divisa de dus e de tres dd’as ant lamadas “Mari e Perda” e “Soli e Trigu”. Totu custu po preniri sa filera chi imbrassat sa cultura e is contus de sa Sardigna nosta. Is fueddus “Coru e Fidi” acumpangiaus de sa scritta “Casteddu”, s’amostant finas in palas, in su colletu, e sempiri in s’aintru de su colletu s’amostat s’eticheta noa cun su nomini de su giogadori chi dd’at bestìa o de su tifosu chi dda comporat.
Castiendudedda de acanta, sa maglia noa de is partidas in domu de su Casteddu est comenti de sempiri dividia in dus cun a un’ala su colori orrubiu e a s’atra cussu asulu. In sa parti indeanti si ddue agatat una pintada chi arregodat s’aneddu de coja campidanesu. Est fata in materiali Sapndex Mesh de arreigini torrau a umperai.
Su scudetu de su Casteddu est in sa parti de su coru e in s’atra parti invecias si ddue agatat su simbulu de s’azienda Eye Sport, e ambos funt in siliconi.
Po chini dda iat bolli comporai est giai possibili a ddu fairi in is giassus uficialis de su Casteddu.
Màuru Mura
Giobia s’otu de austu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://store.cagliaricalcio.com/prodotto/t-shirt-gara-home-rosso-blu/
