Si frimmat in Bologna su caminu de su Casteddu in sa Coppa Italia de su 2022-23. In su Dall’Ara acabbat po 1-0 po is meris de domu gratzias a un’autogol de Obert picigau de unu corpu de conca de Lykogiannis, giogadori chi finas a ocannu passau gioagaiat po sa scuqdra de su presidenti Giulini.
Cussu chi est calau in campu fut unu Casteddu sperimentali, ca medas de is titolaris funt abarraus in citadi po s’allenai in Asseminello po sa partida de dominigu chi benit cun s’Ascoli. Aresti at difendiu sa porta, Zappa, Obert, Capradossi e Barreca in difesa; in mesu campuLella, Viola e Kourfalidis; Pereiro (chi teniat in su brassu sa fascia de capitanu), Lapadula e Millico in denanti.
Ant cumentzau sa partida a bellu is duas scuadras. Su Bologna partit a s’atcau, ma Aresti si fait agatai sempiri prontu. In sa prima mesora su Casteddu amostat feti dus tirus de tesu, cun Barreca e Kourfalidis, chi andant a foras de meda. In segus, cuasi de spantu, is piciocus de Liverani s’acostiant a fairi gol, ma su tiru de foras de aerea de Barreca andat a ndi boddiri sa traversa de sa porta de Bardi. A pustis unu minutu Schouten imbucat sa port de Aresti, ma s’arbitru Camplone negat su gol po fuorigioco, signalau, a dogna manera de su Var. E su primu tempus acabbat aici.
In su segundu tempus Thiago Motta, s’allenadori nou de is bolognesus, fait intrai in campu inderetura Orsolini, Soriano e Arnautovic. Su Bologna pigat campu, ma Aresti non depit fairi nudda de meraculosu. Po su Casteddu imbucant Pavoletti cun Dossena po pigai su postu a Lapadula e Capradossi, ma a metadi de su tempus, a pustis una bella parada de Aresti, is bolognesus faint su gol chi ddis permitit de passai a is otavus de finali de sa Coppa. Unu tiru de sa bandierina de sa parti drestra, conca de Lykogiannis chi boddit Obert e bocia a intru de sa porta de Aresti.
Liverani, a custu puntu, fait intrai Luvumbo cun Cavuoti po Pereiro e Viola, ma s’unica borta chi is casteddaius s’acostiant a sa porta de su Bologna est cun d’unu tiru de Zappa chiBardi non tenit peruna dificultadi a aciapai. Acabat aici sa partida e sa Coppa de su Casteddu, is emilianus ant atobiai, in is otavus, sa Latzio de Sarri E immobile.
Màuru Mura
Cenarba, su 21 de Santu Gaine de su 2022
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22
Foto: https://www.sportmediaset.mediaset.it/calcio/coppa-italia/coppa-italia-bologna-cagliari-1-0-emiliani-agli-ottavi-con-la-lazio_56297461-202202k.shtml
