In sa primu dì de is votatzionis po fairi su presidenti nou de sa Repubrica italiana at bintu sa “scheda bianca” in numuru de 672 in pissu de 976 votus de is 1008, senadoris, deputaus e scioberaus de is regionis, chi tenint diritu! Si sciat beni ca andaiat a acabai aici e non s’est spantau nemus. Corantanoi funt is votus chi non baliant, trintases votus funt andaus a Pàulu Maddalena, candidau de is Steddaus e seixi, invecias, a su presidenti ancora in carriga, Sergiu Mattarella. Calencunu brullanu at donau votus finas a Alberto Angela e calencun’atru a Amadeus.

Oi si torrat a partiri, a is tres de pusti prangiu comenti eriseru e totu. Ma finas oi at andai che eriseru, a suta de ludu si funt fendu is acordius tra is partis po erribai a giobia, candu at a balliri su cincuanta po centu prus unu.

Is capus de is partidus si funt, a dogna manera, atobiaus po cicai de erribai a fairi su nomini de votai. Massimamenti is dus partidus prus mannus, su Partidu Democratigu e sa Lega, ant cumentzau a si chistionai faci a pari intru de Erricu Letta e Mateu Salvini. A su chistionai insoru est donendu crobba manna finas su presidenti de is Steddaus Giusepu Conte. Comenti custu chistionai s’at a tradusiri in su nomini de fairi presidenti s’at a biri, si fueddat meda de su presidenti de su guvernu Mariu Draghi, ma Salvini no est cunvintu meda. S’atra parti manna de sa dresta, is Fradis de Italia, su nomini, po buca de Giorgia Meloni, ddu ant fatu giai eriseru e totu: Carrulu Nordio, chi fut magistrau e at indagua in pissu de su Mose e is coperativas orrubias.

De sa Terra nosta votant, in prus de is senadoris e is deputaus, finas is tres scioberaus de sa Regioni: su governadori Christian Solinas, su presidenti de su Consigliu Migheli Pais e su caputruma de su Partidu Democratigu Giuanni Francu Ganau.

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

 

Foto: https://www.true-news.it/facts/scheda-bianca-significato-a-chi-va-il-voto