S’Abrutzu fait abarrai a sa ghia de sa Regioni a Marcu Marsilio. Su candidau de su centrudrestra bincit sa cuntierra contras de Lucianu D’Amico de su Campu Largu: in is 1.634 setzionis est acabbada po 53,5% (est a nai 327.660 votus) contras de su 46,5% (chi balint 248.748 votus). Po sa lei regionali si podiant votai feti is listas acapiadas a su candidau presidenti. S’allirghia prus manna est cussa de su presidenti de su Consigliu Giorgia Meloni, chi at scritu: “Est cosa manna e bona chi is citadinus de s’Abrutzu apant scioberau un’atra ia a Marcu Marsilio e cun issu finas sa coalitzioni de centrudrestra”. A pustis airi perdiu in Sardigna, is regionalis abrutzesas funt castiadas cun interessu mannu de is segreterias natzionalis de is partidus. “Mai, in is urtimus trint’annus unu presidenti est durau po prus de cinc’annus: eus scritu una pagina manna de storia e abbatiu un’atru muru”, at nau, giai in su noti Marsilio.
Si podiat votai feti in sa dì de eris, de is seti de mengianu finas a is undigi de merì. In is setzionis funt lompius su 52,2 de sa genti chi podiat votai. A contai is votus, a s’imbessi de cussu chi fut sussediu in Sardigna, s’est cumentzau inderetura. Ca Marsilio (agiudau de is Fradis de s’Italia, Lega, Fortza Italia e Nosu Moderaus a is calis si aciungint s’Unioni de centru e sa lista civica “Marsilio Presidente) binciat s’est cumprendiu su matessi inderetura. No est serbiu a nudda, duncas, s’ammnniamentu de su Campu Largu po binciri custa torrada eletorali.
Su partidu chi at pigau prus votus est cussu de is Fradis de s’Italia cun su 24,10%, a sighiri su Partidu Democratigu cun su 20,29%. In su centrudrestra votus medas at pigau finas Fortza Italia cun su 13,44%. In su mentris chi sa Lega de Salvini s’est frimada a su 7,56%. Mali meda, in su Campu Largu, is Steddaus chi ant pigau su 7,01%.
Màuru Mura
Lunis s’undigi de martzu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.lastampa.it/politica/2024/03/11/news/marco_marsilio_chi_e_candidato_regionali_abruzzo_2024-14136384/
