Unu de is giogadoris prus mannus chi su Casteddu apat tentu est de seguru Angilu Domenghini, chi in su 1970 at bintu cussu scudetu chi at fatu storia.
Domenghini nascit in Lallio su 25 de austu de su 1941, candu su mundu fut a suta de is bombas de sa Segunda Gherra.
Erribat a giogai in Serie A candu tenit bint’annus, cun sa maglia de s’Atalanta chi nde dd’at pesau. Giogaiat a bocia e trabagliaiat puru comenti de eletrotecnicu in sa Magrini, ca tandu funt atrus tempus po is giogadoris non comenti a imoi ca bastat un’annu in Serie A po biviri s’orrestu de sa vida.
Su 4 de làmpadas de su 1961 intrat in campu contras de s’Udinese. Abarrat finas a su 1964 cun s’Atalanta, gioghendu 69 partidas e fendu finas 17 gol. De s’annu infatu cambiat citadi ma non coloris ca ddu comporat sa scuadra prus famada de cussus annus: s’Inter de Herrera ca iat bintu sa Copa de is Campionis. Domenghini giogaiat a drestra, ma in cuss’Inter s’agataiat unu giogadori forti de averas e famadu, Jair, non s’urtimu de is lompius. Angilu depit cambiai e ddu fait beni meda, gioghendu mesala o atacanti. Fait noi gol cuss’annu e doxi s’annu in segus. Cun s’Inter bincit dus campionaus, duas copas Intercontinentali e una Copa de is Campionis.
Erribat a giogai in natzionali e scrit paginas galanas meda de sa storia. Bincit is Europeus de su 1968 e lompit segundu in is mondialis messicanus, a palas de su Brasile de Pelè. Cun s’Inter abarrat finas a su 1969, gioghendu 134 partidas e fendu 50 gol.
De su 1969 passat a su Casteddu. Totu is vitorias cun s’Atalanta e s’Inter non balint, de certu, cussu chi arrennescit a fairi, non a sa sola de seguru, cun sa maglia de is sardus. E pensai chi in Sardigna de pastoris e de secuestradoris, comenti fut tandu, non ci boliat benniri, ddu at a nai cussu e totu in atrus annus: “Soi de sa provincia de Bergamo, apu fatu cuatr’annus in s’Atalanta e cincu in s’Inter: non bolia andai aici a tesu de domu. Oi abarru ses mesis in Liscia di Vacca, in is orus de Porto Cervo, in Costa Smeralda, aunia m’apu fatu una domu, e ses mesis in bidda mia, in Lallio. Su sardu no est unu facili, ma chi ddis intras in su coru ti donant totu: est de importu mannu a non perdiri sa fidi insoru e a non ddus pigai in giru. Custu est su logu prus bellu de su mundu e c’est unu mari chi non tenit nemus. Non ti nd’andas prus de sa Sardigna”.
De sa scuadra chi at fatu bisai un’Isula intrea Domenghini est su numuru seti e donat bocias meda a Gigi Riva, amigu in campu e in foras de Angilu, ma cun interessus diversus: “Riva fut amigu de is piscadoris, deu invecias de is cassadoris”.
Feti duas is partidas perdias in cuss’annu e su 12 de arbili de su 1970 su Casteddu diventat Campioni de s’Italia. Una cosa mai bida! De tandu sa Sardigna no est prus famada po is pastoris e po is secuestradoris.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.facebook.com/we.are.cagliari.calcio/photos/tanti-auguri-di-buon-compleanno-oggi-ad-angelo-domenghini-classe-1941-e-che-oggi/3001577993216829/
