Casteddu urtimu in sa classifica de sa Serie po mori de sa partida perdia eris a merì cun su Milan po 1-3 e po sa vitoria de s’Empoli contras de sa Salernitana po 1-0.
Claudiu Ranieri, a dogna manera, tenit feti fueddus durcis po comenti is piciocus sus ant giogau contras de is orrubiusnieddus allenaus de Pioli: “Su Milan tenti giogadoris fortis, comenti si podit amostai castiendu su gol de Loftus-Cheek chi perou non c’intrat nudda cun sa partida, chi nosu eus fatu giai in sa prima parti. Mi soi allirgau cun is piciocus nendu ca soi orgogliosu: sa scuadra at arrespustu in totu e po totu sa partida. Is cosas non si funt ancendu beni e po cussu depeus essiri ancora prus cunvintus. Una cosa est segura: non mollaus po nudda. Lastima po sa faddina chi eus fatu candu su Milan at segnau su paregiu”.
At arriolau Zito Luvumbo, chi at fatu su gol de s’1-0, ccandu est abarru in terra a s’urtimu minutu, a pustis unu “dribbling”. “Feti crampus”, trancuillizat Ranieri. “Ancora poderat unu pagu tropu sa bocia, ma at a cresciri meda”. po immoi su giogadori de s’Angola est su solu chi at fatu gol in custu campionau. Ma, lastima manna, is dus gol chi at fatu, s’atru fut in Bologna, no ant portau perunu puntu. “Su problema de su gol est po mori chi non tengiu a dispositzioni totu is atacantis, finas chi non bogliu bogai a foras scusas. Lapadula at a torrai feti intru de unu mesi e po ddu arregodai est cussu chi at fatu prus gol in sa serie B de ocannu passau”, at aciuntu s’allenadori de su Casteddu.
Ranieri, a dogna modu, tenit feti bellus fueddus po is giogadoris: “Ma oi is piciocus anti donau totu e ant intendiu s’identidadi po sa Sardigna, chi est cussu chi pragit a mei e a is tifosus sardus. Eus fatu gol e insistiu fendu a timiri una scuadra forti che su Milan, fustis gioghendu beni, lastima po cussu gol de s’1-1”.
Màuru Mura
Giobia su bintotu de cabidanni de su 2023
Foto: https://www.youtube.com/watch?v=Gpqpnz_pML0
