Oi, 24 de gennargiu de su 2022, a is tres de pusti prangiu in Montecitorio si cumentzat a votai po fairi su Presidenti de sa Repubrica nou chi at a pigai su postu de Sergiu Mattarella. Funt in milli e otu, intru de senadoris, deputaus e incarrigaus de is binti regionis a votai, de oi finas a candu non at a bessiri sa magiorantzia.

Giorgia Meloni at chistionau ponendu a s’atentzioni su nomini de Carrulu Nordio, magistrau de setantacuatr’annus: “A dogna manera, nosu seus cunvintus chi tochit a andai un’atra borta po votai su Guvernu, finas poita Draghi est acapiau a Sergiu Mattarella. Po nosu su guvernu depit essiri cussu bofiu de sa genti. Calencunu est trabagliendu po torrai a fairi Mattarella presidenti, finas chi ddu at nau craru e tundu ca sa cosa non ddi interessat. Giai est sussediu cun Napolitano, ma non depit essiri un’abitudini cussa de fairi sighiri is Presidentis”.

Chistionendu de nominis sa Meloni at sighiu: “Nominis comenti cussus de Marcello Pera, Letitzia Moratti, Elisabeta Alberti Casellati, Giuliu Tremonti, Francu Frattini andant beni totus. Deu apu nau de fairi atrus nominis finas chi no ant trabagliau in politiga e po cussu eus aciuntu su nomini de Carrulu Nordio. Non creu chi c’apat genti chi ddu possat atacai”.

Nordio comenti de magistrau at trabagliau in is indagus, intru de is atrus, in pissu de is indagus de su Mose e de is coperativas orrubias.

Conte puru at chistionau: “Nosu non naraus nono a nemus, boleus feti unu presidenti chi nosi facat allirgai in s’orrestu de su mundu. Po mei e is Steddaus su guvernu depit andai a innanti aici, poita non podeus non castiai ca c’at familias, impresas e citadini chi tenint bisongiu chi sa politiga sigat a trabagliai. Non si podeus frimai imoi po fairi su Presidenti e a pustis po fairi un’atru guvernu”.

Su Presidenti de sa Camera, Fico, fait sciri ca de is schedas votadas at a ligiri feti su sangunau.

 

 

24 de gennargiu de su 2022

 

 

 Màuru Mura

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

Foto: https://it.wikipedia.org/wiki/Palazzo_del_Quirinale