Casteddu-Atalanta tres a unu. De is bergamascus lompint Piccoli, Adopo e Zortea. E in Bergamo erribat, pigau in totu, Sulemana. Donai crobba a dogna manera ca is cuatru non funt acapiaus a pari, antzis, forsis funt duas o tres operatzionis scapiadas. De una parti Piccoli e Zortea: po issus est giai fata de una pariga de dis. E immoi s’aspetant feti sa dì e su logu aunia fairi is bisitas medicas, dapoi aereu, lompimentu in Casteddu e firma. Tocat feti a tenni passientzia po s’aprontamentu de dogna cosa.
Sa nova manna est ca Sulemana partit a pusti un’annu passau in Casteddu po lompiri de Gasperini, chi forsis s’arregodat ancora su gol e sa partida giogada beni meda de su piciocu in Casteddu cun s’Atalanta etotu.
A su cumentzu sa scuadra de Bergamo pariat interessada a Makoumbou. Invecias candu at lamau su Casteddu at pediu a Sulemana. Su Casteddu non boliat bendiri su giogadori, ma at ascurtau eita donaiat in cambiu Percassi: otu milionis de euros e su giogadori Adopo po un’annu. De arregodai ca Sulemana ocannu passau fut lompiu in Sardigna “feti” po cuatru milionis: duncas a sa societadi de Giulini dd’est cunvenniu!
De arregodai finas ca Adopo fut in disiglius de su Casteddu giai de su mesi de gennargiu passau, ma non si ndi fut fatu nudda.
Atra nova bella e giusta est cussa chi erribat de Asseminello, aunia sa scuadra cumandada de Nicola, est preparendusì a su campionau de ocannu chi benit: Nicolas Viola at a giogai cun su Casteddu finas po su 2024-205. Difatis su cuntratu chi teniat non fut prus validu de su primu de custu mesi, ma Viola s’est minesciu su cuntratu nou in campu.
Cun su dinari chi at a lompiri de Bergamo su Casteddu iat a podiri comporai calencunu giogadori po s’atacu. E a custu propositu si chistionat meda de Kevin Carlos, giogadori spagnolu chi at fatu beni meda in Svitzera in sa scuadra de su Yverdon. Est s’atacu chi andat afortiau prus de totu, massimamenti chi no abarrat Lapadula, chi est pediu de scuadras medas de sa serie B.
Màuru Mura
Martis, su seiixi de mesi de orgiolas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.bergamonews.it/2021/08/19/piccoli-scalvini-e-del-prato-atalanta-chi-tra-i-giovani-merita-di-restare/459640/
