In Thiesi, bidda de su Meilogu chi contat, prus o mancu, 2.800 personis, su Covid si fait intendiri: funt centucincuanta is impestaus e in trexentus s’agatant incungiaus in domu. Numurus artus! E, a dolumannu, una femina, in is dis passadas, est morta in su spidali de Tatari. A dogna modu, unu signali bonu erribat de su “screening” de sabudu e dominigu, in pissu de is discientis de is scolas: intru de 412 cumpudus feti in otu funt arresurtaus impestaus.
“Una bona nova, a pustis dis legias – at nau su sindigu Giuannifrancu Soletta – . Sa spera imoi est chi is numurus s’abbascint, ma po custu depeus aspetai calencun’atra dì”.
Su Covid si fait intendiri finas in Bortigali, in su Marghine, e su sindigu Franciscu Caggiari at donau regulas po butegas e tzilleris de oi finas a ordinantzia noa. Is tzileris de sa bidda ant a depiri serrai a is noi oras de merì.
In su fratempus is numurus de sa pesta in terra sarda de eriseru funt custus: 983 is impestaus nous, chi ndi calant de sa metadi de sa dì a innantis, in pissu de 4.518 cumpudaus. Imoi sa percentuali de positivus est de su 4%. A dolumannu si depit chistionai finas de cuatru mortus: un’omini de setantadus annus e un’atru de otantacuatru de sa provincia de su Sud Sardigna e atrus dus ominis de otantacincu e otantaset’annus chi bivian in sa Citadi Metropolitana de Casteddu.
Si ndi pesat de unu su numuru de chini s’agatat in sa terapia intensiva, imoi si ndi contant bintotu e finas in is atrus aposentus de is spidalis intrant binticincu impestaus nous chi faint artziai su numuru a 216.
Spantosu est su numuru de cussus chi s’agatant serraus in domu: 16.778, 312 in prus de sa dì prima!
Passientzia manna tocat a tenniri, ancora non est acabada, ma cantu ci poneus a cumprendiri ca galu tocat a sighiri is regulas de stesiamentu, vacinu e de mascheredda in cara?
12 de gennargiu de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”
Foto: Archivio Domus de Janas
