Su fini de cida chi teneus a is palas, cussu chi est andau de cenarba cuindigi de martzu a dinnanti de eris, dominigu dixiaseti est stetiu cussu prus legiu po cantu pertocat is mortus in is caminus italianus de su cumuentzu de ocannu. Binticincu is mortus in custas tres dis, in su mentris chi in su fini de cida chi est andau de cenarba seti a dominigu dexi furint stetius seixi”. Duncas su numuru si ndi pesat. Totu custu ddu narat s’Asaps, chi est su sotziu de is amigus de sa Politzia de is stradas, chi s’agatat in sa citadi romagnola de Forlì.
A dolu mannu, est a nai, ca sa Sardigna, po custu acabbu de cida, s’agatat a innantis meda in custa classifica de disisperu mannu.
Funt cuatru is mortus in is caminus nostrus: tres in s’atumbu intru de su caminu chi de Tatari lompit a Salighera, in is orus de Tottubella, aunia si funt mortus Crara Urgias, una piciochedda de cuasi dixiaset’annus, Christian Foddai de bint’annus, ambos sassaresus, e Antoni Luisu Murineddu, de corantun’annus; s’atru est ancora de prus disisperu ca in dd’unu atumbu in sa 125 in Orosei, est mortu unu pipieddu nasciu feti de tres mesis: Alissandru Zamatretta Delgado. Lambrigas po dognunu de custus tocat a tenni.
A innantis de sa Sardigna in custa classifica niedda de morti e orrubia de sanguni feti su Latzio, aunia in su fini de cida passada funt ses is mortus.
De is binticincu mortus – scoviat sempiri su sotziu de is amigus de sa Politzia, seixi funt cussu chi funt setzius in machina, cincu in is motocicletas e cuatru caminaiant a pei.
Is fridus numurus non faint cumprendiri su disisperu de is familias chi s’agatant a prangiri. Chini setzit in machina giai ddu scit ca in donnia s’erriscat de totu, ma unu pagu de prus de prudentzia e de cunsideru po sa vida iat essi giustu. O boleus fueddai de chini umperat su telefoneddu in su mentris chi ghiat?
Màuru Mura
Martis su dixiannoi de martzu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.sicurauto.it/news/blog/incidenti-stradali-tra-corretta-informazione-e-racconto-di-cronaca/
