Po Alisandru Deiola, chi propriu oi lompit is bintiset’annus, non ci podiat essiri arregalu prus bellu. Su centrucampista de suC asteddu de Santu Engiu, difatis at allonghiau sa relata cun sa scuadra de su presidenti Giulini, po un’atru annu. Fut in scadentzia po su 30 de lampadas de su 2024 e invecias immoi at essi in scadentzia s’annnu de fatu.

Deiola, pesau cun is giovanilis casteddaias, at fatu sa prima partida con sa maglia orrubia-asula su seti de cabidanni de su 2015, fendu finas unu gol in sa partida chi fut acabbada po 4-1 cun su Crotone. Su giogadori de mesu campu, po immoi, at bestiu sa maglia po 104 bortas fendu finas 9 gol. Custa chi s’aprestat a giogai at essi su de seti campionau.

Intantsi sighit sa preparatzioni de su Casteddu po s’agatai prontu a su cumentzu de su campionau. Eris cun su Leeds, a pusti airi bintu cun is francesus de su Strasburgo, nd’at boddiu una bella sonada: 6-2 s’arresurtau finali de su stadiu de Ellan Road.

Sa scuadra de Liverani s’est agatada a suta de tres gol insegus a cincuanta minutus giogaus ca iant fatu gol po duas bortas Rodrigo e Bamford. At cicau de ponni sa conca a foras sa scuadra sarda cun dus gol, a metadi de su segundu tempus cun Lapadula e Luvumbo. S’acabu de partida, perou, ancora est po sa scuadra ingresa, chi agatat un agatat un’atru gol de Bamford e in is urtimus cincu minutus atrus dus gol.

Liverani fut lompiu in leeds cun bintidus giogadoris: is portieris Simone Aresti, Boris Radunović; is giogadoris de difesa Giorgio Altare, Salvatore Boccia, Franco Carboni, Alessandro Di Pardo, Edoardo Goldaniga, Adam Obert, Sebastian Walukiewicz, Gabriele Zappa; cussus de mesu campu Nicolò Cavuoti, Paolo Faragò, Christos Kourfalidis, Nunzio Lella, Antoine Makoumbou, Nicolas Viola e is atacantis  Gianluca Contini, Gianluca Lapadula, Zito Luvumbo, Leonardo Pavoletti, Gastón Pereiro, Andrea Pulina.

 

 

 

Màuru Mura

 

 

1 de austu de su 2022

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22

 

 

Foto: https://www.transfermarkt.it/alessandro-deiola/profil/spieler/235931