Sa politiga sarda est in lutu po sa morti de Giorgio Oppi. S’assessori a s’Istrutzioni e consiglileri regionali de s’udc Andria Biancareddu est tra is politigus chi meglius ddu connosciant: “Intendu un dolu a intru de mei – at nau – apu atobiau Giorgio po sa prima borta in Tempio candu tenia 22 annus, ddu connoscia de una vida, m’at imparau meda. Fut un’omini generosu e naraiat is cosas in faci. Est stetiu unu maistu in su decisionismu e tra is cosas chi apu imparau de issu est ca sa politiga si fait po totus”.

S’interru est giai decidiu at essi cras a is cuatru e mesu in sa Basilica de Bonaria. Oi, invecias, est stetia aprontada in s’Aula Consiliari, in su palatzu de s’Assemblea in via Roma in Casteddu, s’aposentu po ddu saludai s’urtima borta. Eriseru su corpus de Oppi at lassau su Brotzu, aunia est mortu. A ddu aspetai is presidentis de Regioni e Consigliu Regionali Christian Solinas e Migheli Pais, is assessoris Alisandra Zedda, Andria Biancareddu e Mariu Nieddu, su presidenti beciu de su Consigliu Regionali Claudia Lombardo. Politigus medas chi funt saludendu Oppi po s’urtima borta. In prus de is consiglieris in carriga si funt bistus Massimu Fantola, Cristiano Erriu e Pierupaulu Vargiu. S’aposentu at essi obertu finas a sa mesunoti e cras de is otu e mesu de mengianu.

“Cussa de Oppi est sa figura de unu protagonista de sa politiga sarda sonumancu de is urtimus trint’annus e fians chi non si dda pensaiat che-i cussu totus scint ca teniat unu pesu po sa democratzia in Sardigna”, is fueddus de su presidenti Anci Sardigna Emillianu Deiana. Chi sighit: “Oppi fut unu democristianu beru: donaiat atentzioni manna a cussu chi si moviat in sa sociedadi, a is classis prus poboras, e connosciat beni meda su territoriu sardu, bidda po bidda. Una memoria storica de s’Autonomia Sarda”.

 

 

Màuru Mura

 

 

27 de triulas de su 2022

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22

 

 

Foto: https://www.fiumicino-online.it/articoli/cronaca-2/lutto-nel-mondo-della-politica-e-morto-giorgio-oppi-parlamentare-udc