Alissandra Todde at pigau 3.061 votus in prus cunfroma a su candidau de su centrudrestra, su sindigu casteddaiu Pàulu Truzzu. Custu est cussu chi ndi bessi a piglius de is paperis, de is circoscritzionis eletoralis, chi funt lompius a su Consigliu Regionali de parti de su Tribunali. Is numurus, duncas, ponint in manera crara sa vitoria, a is eletzionis de su binticincu de friargiu passau, de sa candidada de su Campu Mannu. Ancora no est uficiali, ma si podit nai ca Alissandra Todde est sa femina de unu a diventai presidenti de sa Regioni sarda. Sa Corti de Apellu, non a innantis de mercuris, at a donai dogna cosa, donendu is nominis finas de is sessanta consiglieris chi imbucant in su palatzu de s’orruga Roma po is cinc’annus benidoris.
Po cussu chi bessit a foras, sa cadira chi ancora non si cumprendiat de chini fessit iat essi de is Steddaus, in sa parti de su Campidanu de mesu, e non po su Partidu Socialista in sa parti de Nugoro. Chi iat essi aici is consiglieris de is cincu bias steddaus bessint a otu, in su mentris chi cussus de su Partidu democratigu abarrant a undigi.
Chi non sussedit atra cosa spantosa, sa matessi cadira, at andai a Emanueli Matta e duncas abarrant a foras de is aposentus de su Consigliu Regionali Martinu Canu de su partidu socialista e Ivana Rassu, chi curriat in sa Gaddura po su partidu democratigu.
Is numurus nous duncas ant a contai meda po fairi sa Giunta Regionali, si nd’at a chistionai oi in Aristanis, in s’Hotel Mistral, aunia s’ant a atobiai is consiglieris nous e is segretarius de is partidus de sa coalitzioni.
A pustis chi su Campu Mannu at amosau is numurus, fut girada sa bogi ca sa Corti de Apellu iat giai decrarau totu cun s’uficialidadi. Invecias sa presidenti Gemma Cucca fait sciri ca “is operatzionis de conta po connosciri is bincidoris de is consiglieris nous e de su presidenti non funt ancora acabbaus”.
Màuru Mura
Lunis su digiotu de martzu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.huffingtonpost.it/politica/2024/02/27/news/schlein_conte_cagliati_campo_largo-15233401/
