S’obrigu de poderai sa mascherina in faci finas in logus obertus forsis s’at a mudai. Ddu at nau Francu Locatelli de su Cts: “Bieus is numurus – at nau in televisioni – ma a s’acabu de friargiu podit essiri una possibilidadi”. Totu custu, a acrariu, est acapiau a is numurus de sa pesta “e castiendu custus si decidit cussu de fairi”.

Locatelli at finas chistionau de is novas de is urtimas dis, massimamenti de is regulas noas po sa scola. Pensat beni su scentziau, ma non ci fuliat a un’ala sa possibilidadi de un’atru vacinu. A su cumentzu de su beranu ci podit essiri su vacinu finas po is pipieddus de zeru a cinc’annus: “Dus vacinus po custus puru, comenti de is pipius chi andant de cincu a undixi annus. Iat nai ca est una cosa de pensai e in beranu si podit fairi”.

In su fratempus in Sardigna crescit de duas bortas su numuru de is impestaus: eriseru furint 1.504 e sa dì a innantis “feti” 792. A dolumannu depeus chistionai de atrus seti mortus: tres ominis de sessantatres, setantanoi e otantatres annus chi bviant in sa citadi metropolitana de Casteddu; una femina de setantacinc’annus e un’omini de otantanoi chi biviant in sa provincia de su Sud Sardigna e dus ominis de otantaseti e norantaset’annus de sa provincia de Tatari.

Sa percentuali de is impestaus est de su 6%, in pissu de 24.930 tamponis, e cussa de sa dì a innantis fut de su 2,5%.

Abarrat sempiri oguali su numuru de chini s’agatat in sa terapia intensiva, chi funt trintadus, e calat de cuatru cussu de chini, invecias, est in is atrus aposentus: imoi funt trexentusetantaseti contras is trexentusotantunu de sa dì a innanti.

S’urtimu numuru chi tocat a donai, comenti de sempiri de cuasi dus annus a imoi,  est cussu de sa genti chi s’agatat incungiada in domu po sa cuarantena: 22.748, balit a nai 208 in prus de s’atra dì.

 

3 de friargiu de su 2022

 

 

Màuru Mura

 

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

 

 

Foto: https://comune.comacchio.fe.it/notizie/300245/numeri-utili-covid