Su Casteddu est trabagliendu in Asseminello de eriseru po is partidas de cras in Coppa Italia cun su Sassuolo e de dominigu chi benit cun sa Fiorentina. Lunis ant trabagliau massimamenti is giogadoris chi no ant giogau in Roma, in sa partida perdia po 1-0 e in su mentris cussus chi, invecias chini est calau in campu in s’Olimpico at fatu trabagliu prus lebiu.
A una parti is infortunaus Luca Ceppitelli cun Damir Ceter e s’est torrau a biri Marko Rog, su centrucampista de sa Croatzia chi mancat de una bona pariga de mesis. At a sighiri is curas in Sardigna intru de palestra e campu.
In su fratempus eriseru cun is partidas Milan-Spetzia, Bologna-Napoli e Fiorentina-Genoa est acabada sa giorronada de campionau, cussa de bintidus.
Nova mala po is casteddaius est sa vitoria, intru de morrungius meda, de su Spetzia in Milano. Imoi sa scuadra de Motta est atesu de ses puntus e at giumpau s’Udinese e sa Sampdoria, chi abarrant a binti. Abarrat prus a sus de dus puntus, po is piciocus de Mazzarri, su Venetzia de Zanetti, finas chi at giogau una partida de mancu. Parit, castiendu sa classifica oi, ca sa cursa tocat a dda fairi in pissu de is venetus, ma ancora est tropu acoitu po ddu nai.
Su Genoa parit ca non ddi tengiat prus gana de gherrai, eriseru at buscau ses gol de sa Fiorentina. A pustis Ballardini sa scuadra de Genova c’at stupau finas Schevchenko, si chistionat de su tedescu Labbadia comenti de allenadori nou, ma de foras parit ca non c’ant cumprendiu nudda. Sa spera, po su Casteddu, est chi sigat aici. imoi is toscanus faint ancora prus a timiri po sa partida de dominigu a s’ora de prangiu. Est scuadra forti, massimamenti in s’atacu aunia si dda gherrat cun sabidoria manna Vlahovic chi at giai fatu 17 gol. Ma is urtimas partidas de sa scuadra de Mazzarri faint tenni fidi manna, ca est cambiada sa gana e sa barra de chini calat in campu.
18 de gennargiu de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”
Foto: https://www.gazzetta.it/Calcio/Coppa-Italia/13-01-2022/coppa-italia-ecco-prossime-date-ottavi-atalanta-fiorentina-quarti-430900306845.shtml
