In su mentris chi oi una mirada si donat a s’eletzioni de su Presidenti de sa Camera, eris in Palazzo Madama, cun sa prima prova de unidadi, su centrudrestra s’est giai sciusciau.
Ignatziu La Russa est diventau presidenti de su Senau, comenti boliat cun totu is fortzas Giorgia Meloni, ma cun s’agiudu “de chini non si scit” – de calencunu de sa minorantzia. Fortza Italia no at votau. Cun custa mossa s’erriscat sa tratativa, ancora oberta, po su fraigamentu de sa scuadra de Guvernu.
Su nù de sa cuntierra funt is nominis chi calencunu non bolint chi intrint in su guvernu, e Sirviu Berlusconi at depiu amitiri chi Licia Ronzulli no at a tenni perunu ministeru: c’est “dificulutadi” e tocat a donai “unu signali”, est sa linia chi at bintu intru is asulus.
A votai unu de is faidoris de Fradis d’Italia funt stetius, de Fortza Italia, feti Berlusconi e Elisabetta Casellati, chi fintzas a s’atra dì fut setzia in cussa cadira, sa prus arta de Palazzo Madama, signali custu ca est serbiu po ponni is cosas in pagi: chi su Cavalieri at votau bolit nai ca a s’acabbu de totu balit su chi decidit sa coalitzioni.
Una mediatzioni forsis feti de faciada, poita immoi is parlamentaris asulus si podint finas presentai a sa sola indenanti de su Presidenti de sa Republica.
In su fratempus castiendu is numurus s’agatant 16 schedas in prus de cussas seguras e cumentzat sa cassa a is nominis de s’opositzioni. “No est cosa fata de nosu”, ponit a innantis po primu Mateu Renzi, is noi de Calenda, ant votau totus scheda arba. Ma sa matessi cosa narant de su Partidu Democratigu.
“Non depit sussediri, est de macus, narat Erricu Letta, forsis una parti de sa minorantzia non bit s’ora de intrai in sa magiorantzia”. Sa matessi cosa chi pensant is Steddaus: “Is gioghigeddus solitus chi si faint”. Eus a benni a biri de chini funt cussus 16 votus… no at a serbiri mancu fantasia manna!
Màuru Mura
Cenarba, su 14 de Santu Aine de su 2022
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22
Foto: https://www.fanpage.it/politica/chi-ha-votato-la-russa-presidente-del-senato-la-manina-che-ha-salvato-il-centrodestra/
