Is servitzius segretus de is russus narat chi, a pustis is fueddus, su presidenti francesu Emmanuel Macron at a passai a is fatus, mandendu is sordaus francesus in Ucraina. “Est preparendu un’esercitu de duamila sordaus”, at nau su capu de is servitzius russus, Serghei Naryshkin, narendusì a connoscentzia de cussu chi bolint fairi is francesus po agiudai Kiev chi sa Russia pesat atrus atacus. Naryshkin at finas amelessau nendu ca is sordaus ocidentalis aici ant a diventai “s’obietivu primu” de is russus.
Ma Parigi, cun su ministru de sa Difesa, narat ca no est beru po nudda. “Est sempiri sa manera de donai novas fartzas a su mundu de parti de is russus. Est cosas dde macus cussu chi funt fendu”.
Intantis, intru de is primas cosas de Vladimir Putin, a pustis airi bintu un’atra bia is eletzionis po ghiai sa Russia po atrus ses annus, ddu est sa pensada de sighiri sa relata cun sa Cina, cun dd’unu viagiu in Pechinu in su mesi de maju. Custu ddu narat s’agentzia Reuters, ma ne sa Russia e nemancu sa Cina ddu cunfirmant.
Su pesamentu de is relatas intru de Pechinu e Mosca est de is urtimus dus annus, favoressiu totu de sa guerra in Ucraina e de is santzionis econominas de is Stadus ocidentalis a sa Russia. Chi, po custu, cicat de ponni rimediu cun scambius, massimamenti energeticus, cun s’Orienti: duncas cun sa Cina e s’India. Ma finas atrus Stadus chi tenint relatas de amistadi cun is Stadus Unidus e cun s’Unioni Europea, ant pesau murus cun Putin. Sa testimonia lompit de s’Arabia Saudita, su Kuwait e s’Egitu.
In su terrinu, intantis, sighit a bellu-a bellu, su caminu russu in su Donbass de parti ucrainu. Un’atru logu, cussu de Orlovka, in is orus de sa citadina de Avdiivka, est orrutu in manus de Mosca su mesi passau. Ma is russus depint sighiri a fairi is contus cun is bombas ucrainas in sa regioni de lacana de Belgorod, chi feti in s’urtima cida, po cussu chi narat su governadori Vyacheslav Gladkov ant fatu seixi mortus.
Màuru Mura
Mercuris su binti de martzu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.limesonline.com/rubriche/bollettino-imperiale/l-amicizia-tra-cina-e-russia-non-ha-limiti-ma-la-parola-alleanza-rimane-tabu-14733117/
