“De imbucai in politiga non ddi tengiu peruna intentzioni”. A sighiri is arrastas in politiga de su babbu, Sirviu, mortu mancu de unu mesi, Pieru Sirviu Berlusconi non ci pensat po nudda. Aici parit, sonumancu po s’ora. Poita su figliu de dus de su Cavalieri, in sa prima borta chi chistionat in pubricu, a pustis sa morti de su babbu, amitit, ca sa tentatzioni dd’at tenta.
“Calencuna cosa, a intru de mei, s’est movia – at sighiu a nai intru de mesu de sa presentatzioni de is programas Mediaset po ocannu chi benit – apu pensau ca sa relata de babbu cun s’Italia e is italianus, fata de amori e de libertadi, fut un’eredidadi de sighiri a fairi biviri. Deu immoi tengiu 54 annus, babbu ndi teniat 58 candu est calau in politiga”.
“Chini at a pigai su postu de babbu? Nemus, mai”, at duncas aciuntu. Po s’ora, a dogna manera, non bit sa necessidadi de calai in campu, che-i su babbu: “A innantis de totu sa politiga est un’arti seria, non s’imparat de oi a cras. A pustis non pensu chi siat giustu a lassai is cosas a metadi: creu de depiri abarrai in Mediaset e cicai de fairi beni s’arti mia. E, a dda nai totu, e creu chi siat sa cosa prus de importu, oi non si connoscit emergentzia: a pustis annus medas teneus unu governu scioberau de sa genti chi est fendu beni. E pensu chi Fortza Italia possat donai stabilidadi a custu guvernu”
Cun Giorgia Meloni, Pieru Sirviu tenit “una relata bona. Dda connoscius de tempus meda, est una femina chi mi pragit, giovana e decidia in is pensadas”.
In is studius de Cologno Monzese, su merì intregau a sa presentatzioni de is programas de ocannu chi benit, s’est oberta cun c’unu arregalu chi dd’ant fatu is trabagliadoris: unu videu aunia si torrat a biviri sa vida de Sirviu Berlusconi.
“Torru gratzias a totus”, at nau Pieru Sirviu. E a pustis at tirau unu basu a su cielu.
Màuru Mura
Cenarba, su seti de triulas de su 2023
Foto: https://www.primaonline.it/2023/07/05/384400/mfe-mediaset-palinsesti/
