Is doigi assessoris de sa Giunta de sa Presidenti Alissandra Todde, custu mengianu, faint giuramentu in sa setzida de unu de su Consigliu Regionali.
Eris sa Presidenti at atobiau is trumas de su Campu Largu po cumpartziri su sceberu in pissu de is doigi nominis. Sa nova est ca is Progressistas non ant postu s’indicu po s’assessorau de is Afairis Generalis poita ant torrau a castiai sa cadira a sa cali iant giai donau una mirada, cussa de s’Agricoltura, cun su consiglieri de Tatari Giuanni Francu Satta a su cumandu. A borta insoru sa lista “Unius cun Alissandra Todde”, chi finas a dinnanti eriseru fut a s’Agricoltura at pigau cun dd’una femina, sa funtzionaria pubrica e assessora in Bolotana Maria Elena Motzo, su postu lassau libertu de su partidu de Massimeddu Zedda.
Abarrant, invecias, ogualis totu cussu chi ndi fut bessiu a campu in is dis passadas, a partiri de is delegas abarradas po tempus longu a sa citia: Sanidadi, Trasportus, Enti Locali e Urbanistica. Sa de unu po is Steddaus e is atras duas po decisioni de sa matessi Alissandra Todde. Su benienti de Carrulu Doria a sa Sanidade at essi Armandu Bartolazzi, dotori patolugu e oncolugu, chi fut su numuru dus de su ministeru de sa Saludi de su Guvernu de unu ghiau de Giusepu Conte. Po is Enti Locali su sceberu de sa Presidenti est orrutu in Franciscu Spanedda, archietetu e professori universitariu in su dipartimentu de Salighera. Po is trasportus sceberada, invecias, Brabara Manca, ingegnera e assessora in Cuartu.
Comenti fut facili a intzertai su sceberu de Bartolazzi po sa Sanidadi at fatu fueddai prus de unu, massiamenti poita no est sardu. Ma, ddu difendit sa Todde “est unu paersoni cumpetenti e, feimiddu nai, est a foras de is contus chi teneus innoi in Sardigna: e po mimi custu est una cosa bona meda. Tenni un’assessori friscu, cumpetenti, cun esperientzia politiga, ma finas cun dd’una storia chi fueddat po sei est cussu chi serbit a sa sanidadi de domu nostra”.
Màuru Mura
Martis, su noi de arbili de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.repubblica.it/cronaca/2018/06/20/news/l_ospedale_convoca_il_sottosegretario_saldi_i_suoi_debiti_-300968291/
