“Frimaosì, non sciopeis totu”. Funt is fueddus chi sa nannai de Nahel, su piciocheddu de dixiaset’annus bociu martis passau de unu politziotu in Nanterre, chi s’agatat a su cumentzu de Parigi, at nau po cicai de fairi torrai sa trancuillidadi. Sa morti de Nahel at fatu cumentzai morrungius chi non si funt mia bistus in sa capitali francesa e in atras citadis.
A pustis de cuasi una cida de cuntierras e violentzias, chi ant fatu acapiai a sa politzia prus de tremila e trexentus personis, sa nannai de su piciocu bociu intru de mesu de unu cumpudamentu de unu corpu de pistola, at cicua de cunvinciri chini est calau in is prassas e in is orrugas, prus che atru piciocus e piciocheddus, de dd’acabbai cun is morrungius. Sa politzia francesa at portau agentis medas, si chistionat de milli, in is banlieu pariginas. Is morrungius funt lompius finas a atacai sa domu de su sindigu de L’Hay-les-Roses, in Val-de-Marne. Una machina a totu fortza contras de domu sua. Cosa de macus.
“A sa genti chi est sciopendu dogna cosa, deu nau – at nau sa femina chi si lamat Nadia a is microfunus de sa televisioni BFM TV – chi non seghint is vestrinas, non sciopint is scolas, is autobus. Frimaosì, funt is mamas chi pigant is autobus, ci funt mamas in is caminus”
In su mentris sa ministra prima Borne at assegurau ca “su guvernu non at a lassai chena curpa peruna violentzia e is cundennas ant essi frimas e tostadas.
Màuru Mura
Lunis, su tres de triulas de su 2023
Foto: https://www.tag24.it/688591-proteste-francia-estrema-destra-poliziotto-nahel-fondo/
