Si podit fairi finta de nudda, ma sa sustantzia non parit chi possat cambiai: po ddu nai in pagus fueddus, cussu chi est benendu a foras de su guvernu de sa Meloni parit chi possat essiri su guvernu prus a manca de is urtimus annus. Candu si negat est feti po forma e stili.

De s’orrestu, sa conca tostada de sighiri su surcu de Mariu Draghi est sa prova prus segura. Bastaiat a nosi poderai cussu chi teniaus chi sa pensada fut cussa de mudai po non mudai nudda.

Su probblema, po sa Giorgia natzionali, iat a parri feti cussu de agatai sa formula giusta po ci fairi calai a totus is eletoris chena chi custus si nd’acatint. Po fairi totu custu tocat a ddue trabagliai beni, e serbit tempus, ma sa Meloni est cussa chi de is politicus est sa prus abista e ddu connoscit s’erriscu chi currit.

Cali at podit essiri, duncas, sa sustantzia de su mandau chi su Presidenti de sa Republica at a donai po fairi su guvernu nou? Chi totu parit ca s’incarrigu Mattarella ddu at a donai a Giorgia Meloni, gratzias a is arresurtaus de su votu de su 25 de Cabudanni, non si podint negai atras possibilidadis puru, massimamenti ligendu su programa de s’alleantzia de centrudrestra. Eita acabbu at a fairi su programa insoru in pissu de is mesuras economicas o costitutzionalis? S’at a bolli sighiri su caminu de s’eletzioni diretamenti de su populu po su Presidenti de sa Republica o sa lei in pissu de su federalismu. Aberu custas funt is primas mesuras chi si bolint pigai? De seguru nou, e sa Meloni ddu scit beni e depit “giogai” beni po cicai de non certai cun sa Lega. Sa Meloni tenit una pensada e non bolit andai contras is Istitutzionis Europeas e is atru Stadus. Non c’at nudda de timiri, sa Meloni seus segurus chi scit eita depit fairi: sighiri su caminu de Draghi e aici at a fairi. Eis a benni a biri…

 

 

Màuru Mura

 

 

Martis, su cuatru de Santu Aine de su 2022

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22

 

 

Foto: https://www.nanopress.it/articolo/giorgia-meloni-che-titolo-di-studio-ha-la-nuova-futura-premier-italiana/391489/