Arriolu mannu po Antoneddu Lai, connotu de totus comenti de “Tziu Lai”, giornalista de tempus meda e, massimamenti, conteri de sa vida de is prus debbilis. Eris a merì, intru de unu ricoveru in su spidali Brotzu de Casteddu chi est giai lompiu a duas cidas, at tentu unu infartu e s’agatat in s’aposentu de Rianimatzioni.
Sa nova mala est stetia publicada in sa pagina sua de Facebook, “La Zona”: “Bosi pedu feti una preghiera po Antoneddu”, scrit s’amigu e collega Chicco Lecca, “Antonello, unu piciocu chi pensat, de sempiri, prus a is atrus che a issu etotu… est dificili scriri poita su disisperu e is lambrigas mi frimant sa castiada. Soi inchietu. Eus biviu paris contus medas, ma bosi asseguru ca issu a solu e tzopu at fatu cosas chi perun’atru podiat fairi. Teniat sa machina sempiri prena de cosa de papai. At portau scatulas grais meda de cosa de papai a genti chi ndi teniat abbisongiu e chi non teniant nudda… ma nudda de averas. Ddu tzerriaiant a dogna ora e issu paritat finas candu fut dificili a betai passu, candu perdiat sanguni de su pei, candu non teniat sulidu e partiat finas chi depiat o prandiri o cenai. No importaiat, issu moviat, calencuna borta paris a mei, ma bortas meda finas a sa sola. Teniat sempiri una scatula in prus in machina po cussus de s’urtima ora. Ddu at sempiri fatu chena mai pediri nudda po sei e a sa citia, ascurtaiat a totus cussus chi ddu lamaiant, finas po tempus meda. Mi tzerriaiat e mi naraiat: ‘Chicco, custa familia tenit problemas mannus, agiudamì’, poita deu calencuna bia non bolia andai, ma, dapoi, pigaia sa machina e andaia a nde ddu pigai. E teniat sempiri arregioni. At sempiri castiau su coru de sa genti. Arregalu mannu de custus tempus ma finas de su tempus passau. Eus sempiri fatu is matessis cosas po corant’annus e candu ci fut abbisongiu fut su solu chi beniat cicau”.
“Amigu miu stimau – serrat Lecca – non mi lessis a solu chi depeus agiudai ancora paricia genti. Bosi pedu una preghiera, non mi lasseis a sa sola, po un’omini bonu”.
Màuru Mura
Martis, su bintitres de mesi de orgiolas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.ilpuntosociale.it/index.php/redazione
