Pieru Comandini est su presidenti nou de su Consigliu Regionali sardu. Sessantadus annus, est finas su segretariu regionali de su Partidu Democratigu. Funt serbias tres votatzionis, s’urtima cun corantadus votus, po ddu ponni in sa cadira prus arta de s’orruga de Roma.
S’acordiu in pissu de issu si connosciat giai de tempus. Est probabili meda chi in is dis benientis at a lassai sa segreteria de su partidu. Finas chi est a nai non s’agatat peruna regula chi ddu ponint in obrigu. Ma Comandini iat tentu eita nai, po cussu chi fut sussediu in s’amministratzioni regionali passada, candu su presidenti Migheli Pais iat pigau finas s’incarrigu de coordinadori regionali de sa Lega, non at a faddiri in custa chistioni.
S’incarrigu de Comandini est de importu finas po un’atra arregioni: po cidas medas si fut chistionau de issu comenti de candidau po sa cadira de sindigu de Casteddu po su centrumanca, invecias de sceberai Massimeddu Zedda de is Progressistas. De oi su caminu de su sindigu beciu de Casteddu est prus in calada. E forsis, sa candidaura sua po binciri is comunalis contras de sa candidada de su centrudrestra Alissandra Zedda, iat podit essiri uficializada giai in su atobiu benienti de su Campu Largu.
“S’oberit unu tempus nou e de spantu, poita custu at essi unu tempus de riformas, pedu a totus de trabagliai po custu. Dognunu si depit bestiri cun sa magligedda de sa Sardigna”. Est unu de is passus prus de importu de Comandini, chi s’est amostau cumoviu meda. “Immoi depeus intendiri sa responsabilidadi de scriri paginas galanas po is sardus e ddu podeus fairi feti chi abarraus strintus comenti de unu punnigosu”, at nau torrendu gratzias a totu is sessanta consiglieris. Immoi, “depeus bolai artu, ponendu a un’ala is partidus de apartenentzia. Depeus tenni feti sa pensada de fairi beni po sa Sardigna e po is sardus”. Comandini, in segus, at finas torrau gratzias a Paulu Truzzu, “po cussu chi at fatu e po comenti at chistionau sa dì a pustis is eletzionis, poita Truzzu est omini de is istitutzionis”.
Màuru Mura
Mercuris, su dexi de arbili de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.parlamentiregionali.it/piero-comandini-pd-e-il-nuovo-presidente-del-consiglio-regionale-della-sardegna/
