In sa scheda aunia ant a depiri votai in s’atongiu benienti, po torrai a fairi su Presidenti de is Stadus Unidus, is americanus ant a agatai finas unu de s’arrempili de is Kennedy.
Est Robert Francis Kennedy piticu, nasciu in su 1954, e figliu de tres de Robert Kennedy e, duncas nebodi de John Fitzgerald Kennedy, su presidenti de is Stadus Unidus, bociu in Dallas in su 1963.
Abogau e scritori, Robert Francis Kennedy, ca benit lamau RFK, est un’omini de su Partidu Democratigu, ma non nd’at bofiu intendiri de si candidai cun is Democratigus, chi ant scioberau su presidenti chi est in carriga, Joe Biden, e s’at a presentai comenti de indipendenti.
Po cussu chi narant is sondagius, ca in America, comenti si scit si bivit in custa manera, Robert Francis “amelessat” de ndi tirai votus a s’unu e a s’atru candidaus. Arregodaus ca s’atru est Donald Trump. Ma massimamenti est propriu a custu chi ndi podit pigai de prus. Aici, sonumancu, narat una cica incadessia de sa Nbc news, aunia si narat ca su coranta po centu de is republicanus bit Kennedy cun prus favori, contras de su catodigi po centu de is democratigus.
Po cantu narant is sondagius, Trump est a innanti de Biden de dus puntus intrus de issus, est a nai su 46% contras de su 44%. Ma candu su votu benit ammanniau a cincu candidaus mudat totu e difatis agataus Biden a innanti cun su 39%, sighiu de Trump cun su 37%, in su mentris chi Kennedy bessit a su 13% e is atrus dus, Jill Stein abarrat a su 3% e Cornel West est su matessi a basciu meda cun su 2%.
Su cuindigi po centu de is intervistaus chi iat sceberau a Donald Trump sa bia de unu sceberat a Kennedy candu sa fruchita benit ammanniada a totu e cincu is candidaus, cunfroma a su seti po centu de cussus chi a su cumentzu iant sceberau a Joe Biden.
Eus depiri aspetai a s’atongiu po biri chi totu custu at essi beridadi.
Màuru Mura
Lunis, su bintidus de arbili de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://en.wikipedia.org/wiki/Robert_F._Kennedy_Jr.
