Bincit, chena peruna discussioni, su centrumanca is eletzionis po su scioberu de su sindigu. In is citadis de prus importu mannu comenti Torinu, Roma, ma finas in Varese, Latina, Caserta, Cosenza, Savona e Isernia. Su centrudresta si depit acunentai de Trieste e bastat.

A dogna manera est pagu de averas sa genti chi est andada a votai: feti su 43,94%, duas cidas a oi furint su 52,67%.

In Roma sa partida s’est serrada inderetura, is dixianoi puntus in prus de Robertu Gualtieri funt spantosus e Michetti, su candidau de su centrudrestra ddu at cumprendiu, chena si cicai scusas. A pustis un’ora de sa serrada Gualtieri podiat giai festai: “Torru gratzias a is romanas e a is romanus – at nau su sindigu nou – po mei est un’onori mannu e nau giai ca ap’essi su sindigu de totus. Cumentzat po nous unu trabagliu mannu po cicai de fairi cresciri Roma e po dda fairi funtzionai comenti si depit”. De su cantu su Michetti at nau: “Facu is augurius prus mannus a Gualtieri, poita su beni de Roma est sa cosa prus importanti de totus. Deu ce dd’apu posta totu e de prus non podia fairi”.

Su centrumanca bincit in Torino puru, e innoi puru s’est cumprendiu inderetura. Stevini Lo Russo est su sindigu nou de sa prima capitali italiana. Festa manna de totu sa genti chi ddu at votau: “Soi allirgu meda – at nau Lo Russo – e su coru mi batit a forti. Custa vitoria dda intregu a unu chi po mei est stetiu unu maistu mannu: don Aldo Rabino”. Don Rabino, mortu in su 2015, fut su predi de sempiri a su costau de sa scuadra de fubal de su Torinu, e at agiudau Lo Russo a cumentzai a fairi volontariadu e politiga.

Custus is fueddus de chini at perdiu, Damilano: “Torino non tenit gana de gherrai po mudai. Chini at perdiu a beru est sa politiga e finas sa citadi chi no at bofiu gherrai”.

In Trieste, comenti eus nau, vitoria de Dipiazza de su centrudresta, ma in Varese, cun Galimberti, Cosenza, cun Caruso, Savona, cun Russo, Latina cun Coletta, Isernia cun Castrataro, Caserta cun Marino, bincit sempiri su centrumanca.

 

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

 

 

Foto: https://www.gualtierisindaco.it/online/