Su cantu a tenori, chi si nd’est pesau in su mundu de sa cultura pastoralis de sa Sardigna, est una spetzia de cantu polifonicu realizau de cuatr’ominis chi umperant cuatru bogis, una diversa de s’atra. Custas bogis benint tzerriadas bassu, contra, boche de mesu e boche. Sa carateristica primaria de su cantu a tenori est s’intonatzioni profunda e guturali de su bassu e de is contrasbogis. Si cantat ponendusì in tundu e in peis. Is solistas cantant un’orrogu o de prosa o de poesia, chi podint essiri finas formas contemporaneas, e is atras bogis acumpangiant fendu su coro.
Sa boche depit donai su ritmu e sa tonalidadi chi su coru depit sighiri in armonia. Su bassu est sa prima bogi guturali de sa truma: s’otenit ponendu in vibratzioni, paris, is cordas vocalis e is cordas vocalis fartzas. Sa contra est sa bogi de dus de sa truma: su sonu est possenti e metallicu. Infinis, sa mesu boche est a bogi prus durci e si ponit cunfroma a su duetu bassu-contra.
Su numuru prus mannu de chini cantat a tenori bivint in sa barbagia o in sa Sardigna de su centru. Est facili meda a ddus biri cantendu in is tzilleris, ma finas in ocasionis publicas e cerimonias e po su carrasecare barbaricinu. Su cantu a tenori est indifendiu a is mudamentus de sa sociedadi, massimamenti cussus socio-economicus comenti sa decadentzia de sa cultura pastorali e su pesamentu de su turismu. Difatis erriscat de orrovinai sa diversidadi de is regortas e sa manera originaria de comenti si cantaiat.
Is novas in pissu de is originis de su cantu a tenori si cunfundint in su tempus e no est possibili a tenni una data segura. Si narat ca su cantu a tenori siat nasciu comenti po strociri is bogis de sa natura: aici su bassu iat a strociri su boi, sa cotra sa bogi de s’erbei, sa mesu oche cussa de s’angioni e su solista invecias fut s’omini, cussu chi ce dd’at fata a dominai sa natura. Ma bai e cica chi totu custu est beridadi.
Màuru Mura
Giobia, su cuindixi de austu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://a-tenore.org/canto_a_tenore.html
