E tres! Immoi funt tres is domus aunia at biviu Mateu Messina Denaro! Cussu chi no est bessiu a campu po trint’annus est bessendu totu paris feti immoi. Est un’atru apartamentu, aunia su boss iat airi biviu finas a su mesi de làmpadas de ocannu passau. S’agatat sempiri in sa matessi bidda, Campobello de Mazara, aunia funt is atras duas domus cumpudadas de is carabineris, a pustis airi acapiau su mafiosu. De cantu si scit custa domu fut sbuida e prontu a essiri bendiu. Is indagadoris funt cichendu de connosciri chini est su meri.
S’atra dì, in sa domu de duas, cumpudada sempiri de is carabineris, iant agatau prendas medas e calencuna scatula sbuida, forsis sbuidadas una borta chi Messina Denaro est stetiu acapiau. Sa domu s’agatat a nemancu unu chilometru de sa prima, scioberada de su mafiosu de Castelvetrano in is urtimus mesis de bandidantzia e comporada de Andria Bonafede, su geometra chi dd’iat “lassau” s’identidadi sua.
S’aposentu de is segretus fut in domu de Erricu Risalvato, incurpau, ma a pustis non cundennau, po essiri mafiosu e fradi de Giuanni Risalvato chi po mafia est stetiu cundennau a catodix’annus de presoni.
S’allonghiat de ora in ora sa lista de chini at agiudau su boss: Giuanni Lupino, chi no iat mai atobiau sa giustissia” chi ddi faiat de autista e chi dd’at acumpangiau lunis passau in sa clinica Maddalena; Andria Bonafede, chi at comporau sa domu de orruga Santu Idu; Filipu Zerilli, primariu de oncologia; Arfonsu Tumbarello, su dotori de Castelvetrano chi ddu teniat in cura.
Eriseru, intantis, Messina Denaro non s’est presentau, in videucunferentzia de su presoni de L’Aquila, a su processu de su tribunali de Caltanissetta, aunia funt fendu su processu po is stragis de Capaci, aunia est mortu Giuanni Falcone, e orruga D’Amelio, aunia est mortu Pàulu Borsellino.
Màuru Mura
Cenarba, su 20 de gennargiu de su 2023
Foto: https://www.today.it/cronaca/matteo-messina-denaro-carta-identita-andrea-bonafede.html
