No ant mai bidu peruna violentzia e no ant mai bidu is messagius chi Ragatzu mandaiat a sa cumpangia. Eriseru si funt amostaus cuatru de is cincu testimongius cumbidaus de sa Procura de Tempiu in su processu contras de Tanieli Ragatzu, su giogadori de s’Olbia incurpau de stalking e de airi stratagliau sa sposa sua de su tempus.
A chistionai est lompia sa sorresta de sa cumpangia de Ragatzu, su pobiddu e dus cumpangius, e amigus, de trabagliu de sa picioca chi at denunciau. Totus ant contau is matessis cosas e ant nau ca sa femina ddus at avertius de sa presunta violentzia feti a pustis chi is dus si furint lassaus.
Fueddus chi ant fatu nai a s’abogau Filipu Pirisi, chi difendit Ragatzu, ca funt benendu a foras una filera de scontrorius: “Totu sa familia de sa picioca fut aici in disisperu po cussu chi narat issa, ma nemus, in noi mesis, at mai pensau de erribai in Olbia po biri comenti istaiat – at nau s’abogau de su giogadori de fubalu –. In prus ant nau ca issa fut sparessia, dapoi ant contau ca fut posta mali. Nosi pregontaus comenti facant a nai custu chi non dda iant mai bista in totu custu tempus”.
Sa denuncia de sa femina, difendia de s’abogada Cristina Cherchi, est po is chistioni chi pertocat su tempus de un’annu, chi andat de su mesi de talamini de su 2016 a cussu de su mesi de talamini de su 2017. Intru de custu tempus sa cumpangia de Ragatzu fut pringia. A custa cuntierra intru de is dus c’est acapiada finas un’atra, aunia in partis funt a s’imbessi. Est a nai ca difatis est Ragatzu a airi denunciau cussu chi fut su sorgu po disciamiu e testimongiu fartzu. In sa depositzioni su babbu de sa femina est torrau indasegus, nendu ca sa chistioni est stetia posta in movimentu de issu de sa pobidda e de sa figlia.
S’udientzia benienti at essi su seti de martzu, in s’aposentu de su tribunali s’ant a amostai is urtimus testimongius de chini incurpat.
Màuru Mura
Mercuris, su dixiaseti de gennargiu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.tribunaletempiopausania.it/
