Oi bosi boleus chistionai de unu giogadori de fubal chi at lassau arregodus mannus in Casteddu e at sighiu a biviri in terra sarda una borta acabau de giogai a bocia: David Suazo.

Nasciu in San Pedro Sula, in Honduras, su nomini po intreu est Oscar David Suazo Velasquez e at bidu sa lugi su cincu de Sant’Andria de su 1979. Candu giogaiat fut unu lestru meda e giostraiat sempiri in atacu.

Cumentzat a giogai, comenti de professionista, in su 1988 in su Deportivo Olimpia e su Casteddu, allenau tandu de Oscar Tabarez, ndi abarrat spantau in su 1999 candu Suazo at giogau in is Mondialis po is piciocus a suta de is bint’annus. Non ci ponit meda Cellino a ddu comporai e Suazo, aici, diventat su primu de s’Honduras a giogai in Italia. Su primu campionau chi fait cun su Casteddu no est nasciu cun sa stedda bona, ca a s’acabu nc’est calau in serie B. Suazo, a dogna manera, giogat po 13 bortas e fait finas unu gol. Abarrat in Serie B po una obna pariga de annus e agiudat sa scuadra sarda a nci torrai a bessiri aunia si depit sempiri agatai, in su 2003-04 fendu 19 gol. In is tres annus chi sighint, totus in serie A, Suazo fait gol medas e agiudat sa scuadra a si sarvai. De su 2005-06, cun 22 gol, est su giogadori de su Casteddu chi segnat de prus in d’unu campionau, fut unu “record” chi duraiat de su 1970 candu Gigi Riva nd’iat fatu 21.

Si cumprendit ca cun totu custus gol su piciocu non podiat abarrai in Casteddu e difatis in su 2007 ddu comporat s’Inter. Cun is nieddus asulus bincit su scudetu fendu 8 gol in 27 partidas. Ma non bastant a abarrai cun sa scudra de Milanu, allenada tandu de Mourinho chi non sciat ita si ndi fairi de unu giogadori aici lestru, e Suaza ce dd’acabat in Portogallo a giogai cun su Benfica. Torrat a s’Inter ma giogat pagu de averas e po custu andat a giogai a innantis cun su Genoa e a pustis cun su Catania. Acabat de giogai in su 2013 candu teniat feti 33 annus.

Una borta acabau de giogai trabagliat po su Casteddu andendu in giru a cicai giogadoris bonus. In su 2014 intrat a trabagliai cus s’allenadori de tandu Ivo Pulga e s’annu infatu ddu fait cun Gianluca Festa. Si pigat su patentinu po podiri allenai in su 2017. A innanti de tenni su patentinu iat trabagliau, cun a su costau sempiri Ivo Pulga, cun su Brescia, ma pagu est durada cussa coja.

Su 12 de maju de ocannu passau cumentzat a trabagliai po su Carbonia, comenti de allenadori, in serie D.

 

 

Màuru Mura

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

Foto: https:.calcioscout.com/blog/2016-11-18/che-fine-ha-fatto-david-suazo