Fueddus macus de unu professori
“Chi s’agatat una specie de discientis a is calis ia donai, cun prageri, fogu, comenti a Giuanna D’Arco, beh, Les (su Liceu economicu sociali) est sa sigla giusta”.
S’oberit su caminu disciplinari in is cunfrontis de unu professori de su Liceu de is scentzias umanas e scientificu de Aosta, chi at pubricau in sa pagina Facebook sua unu scritu spantosu a pustis un’ora de suplidura in dd’una classi aunia is discientis, si ligit in su matessi scritu, “non funt capassus de acetai sa regula prus elementari de manera de si cumportai, poita in familia no ant tentu perunu imparu”. “E bistu ca is caglientadoris allutus in custa scola non ddus apu mai intendius – at sighiu a scriri su professori – una classi chi in custu tempus de s’ierru poderat totu e is cuatru fentanas obertas po cincuanta minutus no est su paris de discientis, ma feti de concas de c…. Sa spera est chi passint totu ocannu cun d’una bruncuprumonita fulminanti”.
E galu sighit: “No est mudau nudda de candu ddue insegnaia deu otu annus a immoi. Non ce dda fait a abarrai setzius. Non ce dda faint a abrarrai frimus. Non ce dda faint a si ndi pesai de una cadira chena fairi sonu. Non ce dda faint a chistionai chena aboginai. Non ce dda faint a castiai unu film s’urtima dì de scola, poita non tenint atra manera de nai ca bivint chi non aboginendu”.
Custu scritu est steriu publicau in Facebook su bintidus de su mesi passau, s’urtima dì de scola a innantis de is dis de pasu po Paschigedda. E unu discienti, chi s’est intendiu ofendiu ddu at signalau. Candu su “screenscho” est lompiu a is uficius de sa Regioni de sa Baddi de Aosta, sa “meri” de is studius Marina Fey ddu at mandau a su dirigenti scolasticu de sa scola Giuanni Peduto, po biri chi si podiat cumentzai unu caminu disciplinari. Ma sa Fey at fatu chistionai finas su professori, pedendudeddi de ndi tirai su scritu e de ndi publicai un’atru aunia si scusaiat cun is discientis.
Màuru Mura
Cenarba, su cincu de gennargiu de su 2024
Attività realizzata col contributo della Regione Sardegna – Imprentas 2023-2024.
Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.lonelyplanetitalia.it/articoli/citta-del-mondo/un-viaggio-nella-storia-tra-vigne-ordinate-e-castelli-da-sogno
