Est bessiu in su mesi de Sant’Andria de ocannu passau su libburu de Roberto Montesi in pissu de is contus de su Casteddu de Mariu Tiddia, allenadori sardu de Sarrocu chi at portau sa scuadra de fubalu sarda a tenni is arresurtaus meglius a pustis su scudetu de su 1970. Fut un’atru tempus, su fubalu fut un’atra cosa e is giogadoris si poderaiant is numurus in is palas de s’unu a s’undigi. Roberto Montesi, chi giai iat scritu po Delfino Editore “La nazionale cagliaritana”, aunia contat de cussu giogadoris strangius chi ant scioberau de abarrai a biviri in Sardigna a pustis airi smitiu de giogai, s’incrarat in su mundu de s’acabbu de is annus setanta e su cumentzu de is annuso tanta de su seculu passau. Unu Casteddu totu italianu, chena perunu giogadori strangiu, fut cussu de “Cincinnato” (aici beniat annomingiau Tiddia), de su presidenti Delogu e de Gigi Riva chi fut su diretori sportivu, ma non feti. Montesi cumentzat contendu de su campionau, in serie B, de su 1978-79, bintu de sa scuadra orrubia e asula e de cussus de sa Serie A de su 1979-80, acabbau cun su postu de seti, e de su 1980-81 acabbau galu meglius cun su postu de ses. Sighit, Montesi, chistionendu, cun pinna durci e sabia, de dogna giogadori de cussus annus, partenduru de Corti, Lamagni, Longobucco e sighendu cun is atrus chi ant spantau totu sa Sardigna in cussus annus. De balentzia manna est ca Roberto Montesi donat su matessi interessu a giogadoris famaus che Mariu Brugnera o Gigi Piras comenti a Alisandru Cristiani o Marcu Dasara. A is giogadoris sighint is dirigentis, cussus de is ominis de campu e de is giornalistas. Montesi, in segus, donat su fueddu finas a is giogadoris de is atras scuadras italianas chi contant de cussu Casteddu, de arregodai Franciscu Graziani, Claudiu Sala, Pepinu Bruscolotti e Sarbadori Bagni. A totu custus s’aciungint atrus contus chi Montesi at agatau in is arregodus sus. In mesu a su libburu s’agatant imaginis a coloris de cussus annus.
Trabagliu mannu e spantosu de averas cussu de Roberto Montesi chi dogna tifosu sardu iat a depiri ligiri po cumprendiri de aunia si lompit.
Màuru Mura
Giobia, su cuatru de gennargiu de su 2024
Attività realizzata col contributo della Regione Sardegna – Imprentas 2023-2024.
Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.domusdejanaseditore.com/catalogo/1430-corti-lamagni-longobucco-la-storia-del-cagliari-di-tiddia.html
