Sonumancu centutrintaseti mortus. Custu est su numuru chi at donau su presidenti ucrainu Volodymyr Zelensky a s’acabu de sa dì de eriseru a pustis s’intrada de is russus in Ucraina. Su presidenti at chistionau de mortus chi funt militaris e genti comuna. “Atrus 316 funt cussus lantiadus”, at aciuntu Zelensky. In su mentris sighint a lompiri a s’Ucraina fueddus de solidariedadi de dogna parti de su mundu, ma is militaris russsus funt acanta de intrai in sa capitali Kiev. Su presidenti de is Stadus Unidus Biden at affortiau is santzionis contras de Mosca.
Su segretariu de sa Difesa de sa Gran Bretagna Ben Wallace at nau ca in sa prima dì de atacus sa Russia at faddiu. “Po immoi, at fatu sciri, Mosca contat 450 sordaus mortus. Seus cunvintus chi sa Russia bogliat invadiri totu s’Ucraina. Putin est trabagliendu po custu de mesis e mesis, de seguru de un’annu o de prus puru. A Putin de agatai un’acordiu non dde ddi frigaiat nudda, sa pensada sua est sempiri stetia cussa de si pigai is terras”.
Sempiri su presidenti Zelensky in twitter at scritu: “Difendeus sa libbertadi nosta e sa terra. Teneus abbisongiu de agiudus de sa comunidadi internatzionali”, aciungendu puru de airi chistionau cun su presidenti de sa Polonia Andrzej Duda e de airi pediu agiudu a is “Noi de Bucarest”. “Paris – scrit ancora – depeus ponni sa Russia a una mesa po cicai un’acordiu. Teneus abbisongiu de atra genti po nai ca nou a sa guerra”.
Custu mengianu at torrau a fueddai nendu ca is atacus russus funt sighendu e ca is mesuras de Biden e de s’Europa non bastant. Zelensky at nau ca su mundu sighit a castiai de tesu cussu chi est sussedendu in Ucraina. “Custu mengianu seus a sa sola a cumbatiri e a difendiri s’Ucraina, is atrus abarrant a castiai. Est lompia s’ora de fairi calencuna cosa”. Po immoi non si movit nudda.
25 de friargiu de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”
Foto: https://it.wikipedia.org/wiki/Volodymyr_Zelens%27kyj
