A pustis su carrabusu de is “tifosus” de Bolsonaro, su presidenti beciu de su Brasile, in su Paralmentu de Brasilia, totu su mundu est abarrau spantau, ma at inderetura pigau positzioni po difendiri sa democratzia de su Stadu prus mannu de s’America Latina. Su matessi Bolsonaro si narat ca s’agatat ricoverau in Florida po doloris fortis a s’entiri. Propriu in is Stadus Unidus, su deputau Joaquin Castro, chi fait parti de sa cumissioni de is afaris strangius de sa Camera, at chistonau cun sa Cnn nendu ca Bolsonaro at umperau is matessis armas de Trump po cicai de si pigai su poderi. “immoi Bolsonaro s’agatat in Florida, ma depit essiri mandau in Brasile. Is Stadus Unidus non depint donai ospitalidadi a cust’omini autoritariu chi nd’at bogau a campu su terrorismu in domu sua in Brasile”, at aciuntu Castro.

Fintzas sa deputada de is Dem, Alexandria Ocasio-Cortez, non ddue girat in tundu cun is fueddus e pedit, fintzas issa, a Washington de ci stupai Bolsonaro de is Stadus Unidus po ddu donai in poderi a is atoridadis brasilianas: “Causi dus annus a pustis chi su Capitol fut stetiu carrabusau de is fascistas, bieus atrus movimentus fascistas in s’esteru cicai de fairi sa matessi cosa in Brasile”.

In su mentris bessint a milli e cincuxentus is personis acapiadas. Reatzionis mannas, a su carrabusu cuasi oguali a-i cussu de Capitol Hill in su mesi de gennargiu de su 2021 de is “tifosus” de Donald Trump, a pustis chi Joe Biden iat bintu is eletzionis, fintzas de s’Unioni Europea.

“Soi frima in su cundennai su carrabusu a sa democrztzia de su Brasile. Est un’arriolu mannu meda po totus nosu chi difendeus sa democratzia. Soi a su costau de su Presidenti Lula, in totu e po totu cussu chi podit serbiri. Arregodu ca Lula at bintu is eletzionis in sa giusta manera, chena coglunai a nemus e donendu libertadi a totu is brasilianus”, at scritu in Twitter sa presidenti de sa Cumissioni Europea Ursula Von der Leyen.

 

 

 

Màuru Mura

 

 

Martis, su dexi de gennargiu de su 2023

 

 

Foto: https://www.ilriformista.it/brasile-sotto-attacco-la-polizia-riprende-il-controllo-dopo-lassalto-al-parlamento-bolsonaro-condanna-i-suoi-sostenitori-337833/