“Scarcasciu Italia” funt is fueddus umperaus de prus de is giornalis strangius po chistionai de sa partida de sa Natzionali de eriseru a merì in Palermo, perdi apo 1-0 cun sa Macedonia po si giogai, chi iat airi bintu, sa finali po erribai a is mondialis de fubalu de su Qatar. Po sa de duas de sighiu, duncas is asulus, ant essi un’atra borta in deannt de sa televisioni. Giai in su 2018, candu si furint giogaus in Russia, iant faddiu sa cualificatzioni. Tandu totu sa curpa ce dda iant betada a Ventura, e imoi de chini est sa curpa?
Is giogadoris ant giogau cun pagu barra e is solus chi ant amostau de dda tenni funt stetius Verratti, Berardi e Bastoni, is atrus ant de averas cuasi tirau sa camba a palas. A sciasciai totu c’at pensau Trajkovski chi a s’acabu de sa partida at postu sa bocia a is palas de Donnarumma.
S’allenadori Mancini at cumentzau sa partida fendu giogai in mesu de su campu Barella, Jorginho e Veratti, ddus acumpangiaiant de una parti Florenzi e de s’atra Emerson in denanti Berardi, Immobile cun Insigne, in su centru de sa difesa Giuanniluca Mancini cun Bastoni e at poderau, po no ddu erriscai de calencunu infortuniu a Chiellini pensendu de ddu fairi giogai, forsis, in sa finali contras de Cristianu Ronaldo. Ma is partidas andant giogadas a una a una e non tocat mai a fairi is contus a innantis.
S’allenadori de sa Macedonia Milevski at arrespustu cun d’una formatzioni chi pensaiat prus a si difendiri che a atacai.
Po mesoredda cussu chi ant amostau is giogadoris in campu est stetiu pagu cosa e tirus in is portas si ndi funt bidus po nudda, feti passada sa mesora c’at provau Berardi, ma nudda de perigulosu.
Sa matessi cosa est sussedia in sa parti segunda de sa partida, Mancini at cicau de mudai is giogadoris fendu intrai Tonali, Pellegrini e Rasapdori po Barella, Immobile e Insigne, ma nudda est cambiau. Finas a candu est lompiu su gol de Trajkovski chi at permitiu a sa Macedonia de si giogai sa finali po is mondialis.
25 de martzu de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”
Foto: https://www.ansa.it/sito/notizie/sport/calcio/2022/03/24/mondiali-litalia-si-gioca-tutto-mancini-sappiamo-cosa-fare-_7e007f1d-929d-4201-90a2-e5052a7d15fa.html
