Sa Russia est pronta a agatai “solutzionis diplomaticas” cun Kiev e su mundu de s’Ocidenti po su problema in Ucraina. Ddu at nau Vladimir Putin, a su incrasi de s’invasioni de su Donbass de is sordaus de Mosca. Intrendu in su Donbass sa Russia est torrada in segus de is acordius de Minsk de su 2014.

“Sa Russia – at nau su presidenti Putin – non serrat is jannas a nemus, est sempiri pronta a fueddai cun totus po cicai de agatai una solutzioni. Ma una cosa bogliu nai: non si podit de is interessus e de sa seguresa de sa genti chi bivit in Russia”.

Cunfroma a is fueddus de Putin sa solutzioni diplomatica si stesiat. Su segretariu de Stadu de is Usa Blinken at scancellau s’atobiu cun Lavrov, chi fait su matessi trabagliu in Russia. “Seus bivendu su prus grandu amelessu a sa seguresa de s’Europa de candu est acabada sa Segunda Guerra Mondiali”, at nau Blinken e su matessi presidenti de is Stadus Unidus Biden at nau de non bolliri chistionai cun Putin finas a candu non torrat a palas.

Eriseru a merì Joe Biden at fatu sciri a su mundu totu is mesuras chi andant contras de sa Russia e at acrariu ca non bolint atacai, ma si funt difendendu: “Boleus feti agiudai s’Ucraina de dogna metru de terra chi sa Russia bolit furai”.

Su presidenti americanu est cunvintu chi sa pensada de Putin est cussa de lompiri finas a Kiev, sa capitali de s’Ucraina.

Chi po Usa e Inghilterra is mesuras contras is russus funt seguras, no ateretanti dda pensant atrus stadus europeus, poita ddue funt interessus mannus de dinari. A innantis de totus sa Germania e s’Italia chi tenint acordius po su gas massimamenti.

A s’acabu de s’atobiu, in Parigi, intru de is ministrus de is Esteri de totu Europa, s’est decidiu de donai mesuras ma chena tocai Putin, comenti invecias ant fatu is atrus.

Sa situatzioni est sempiri cambiendu de ora in ora. Sa spera est cussa de agatai un’acordiu, ma parit dificili meda.

 

 

 

Màuru Mura

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

Foto: https://tg24.sky.it/mondo/2022/02/22/ucraina-donbass-repubbliche-separatiste-cosa-succede