S’agatat in presoni de candu teniat seix’annus, su acapiu de unu est de su mesi de friargiu de su 1976. Oi s’omini chi tenit prus de sessant’annus, est scontendu su presoni a vida in sa presoni nugoresa de Badu ‘e Carros. “Su dolu e su pensamentu chi si provat a s’idea de depirri morriri in presoni est una cosa chi non si podit nai”, si ligit in ddd’una litara chi at mandau a su sotziu “Socialismi Diritti Riforme”, chi at fatu connosciri is fueddus de su presoneri. “Soi stetiu acapiau po sa borta de unu in su 1976 e de tandu, a parti una pariga de annus ca mi soi fuiu de su presoni de s’Isula de Pianosa, soi sempiri stetiu in dd’una cella. Est beridadi ca mi soi fuiu paricias bias, massimamenti po mori de corpus de conca depius a su disacatu de depiri torrai a intru, ma de su 1987 finas a immoi non apu mai fatu prus nudda candu apu tentu calencunu permissu”, scrit su cundennau a su presoni a vida.

“Tengiu sessantatres annus e nd’apu biviu corantaseti in presoni. Ma, fendu totu is contus chi si depint fairi po is presoneris, est comenti chi nd’apa fairi cincuantases, chi funt prus de duas bortas de cussu chi narat su codici penali poita unu cundennau a s’ergastulu possat pediri sa liberatzioni a innantis. Immoi in su benidori miu s’amostant feti dus caminus: pediri sa gratzia a su presidenti de sa Republica o a mi bociri, poita non ce dda facu prus de averas”.

“Fueddus de spera ma finas de disisperu chi non si podint lassai frimus – narat Maria Gratzia Caligaris de ‘Socialismo Diritti Riforme –. Fueddus chi faint pensai a fundu de cussu chi podit essiri sa vida a intru de unu presoni e in pissu a su pensamentu de essiri a sa sola. Una vida nascia trota e faint pensai a su principiu de si torrai a ponni in giogu, massimamenti candu custu caminu cumentzat in is primus annus de vida de un’omini. Chi non s’agiudant is presoneris abarrant a sa sola”.

 

 

 

Màuru Mura

 

 

Sabudu, su ses de gennargiu de su 2024

 

 

Attività realizzata col contributo della Regione Sardegna – Imprentas 2023-2024.

Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://www.rainews.it/tgr/sardegna/articoli/2023/12/lite-tra-detenuti-a-badu-e-carros-due-agenti-al-pronto-soccorso-c364d14e-b2d1-4bc5-9fee-950b11ab8a43.html