Funt serbius cuindixi annus longus ma a su contu de sa bandidura de Cuiricu Carta de Buddusò, immoi si podit nai ca est acabau.
Su contu cumentzat su catodixi de friargiu de su 2008. Carta, corantaset’annus, imbucat in d’unu tzilleri de sa bidda sua e sparat a duas personis chi funt a intru. Ambos abarrantan lantiaus, ma ce dda faint a si sarvai. Carta si fuit e sparessit. In medas cicant de ddu cunvinciri a si cunsignai a sa giustissia, chena peruna arrespusta, e de tandu cumentzat sa bandidura de Cuiricu Carta.
Su dixiaseti de Santu Gaine de su 2012 acabat su processu po airi cicau de bociri is dus in cussu tzilleri e su buddusoinu benit cundennau a seixi annus de presoni.
De tandu, is carabineris, massimamenti cussus de su “Nucleo operativo e radiomobile” de Uthieri sighint s’indagu po agatai Carta. Umperant totu cussu chi fait. Su trabagliu de sa giustissia est longu meda, ma a s’acabu Carta benit agatau in sa parti bascia de sa Corsica, aunia bivit cun d’unu atru nomini cun sa cumpangia de vida. Sa femina non sciat nudda de Cuiricu Carta e ddu insighit a tzerriai “Antoni” comenti si fut fatu connosciri, nendu ca lompiat de Nugoro.
Is dus ant biviu in serenidadi in su monti fintzas a su mericeddu de su trinta de gennargiu de su 2018 candu “Antoni” benit curpiu de un’istrali chi ddu bocit. Su dus de làmpadas de tres annus a pustis, sa giustissia erribat a domu de sa cumpangia de Carta po cumpudai. In prus de agatai documentus italianus fartzus, prus che a totu una tessera sanitaria e una carta de identidai, scavendu benit agatada una scatuledda cun su cinisu de su corpus de “Antoni”, Cuiricu Carta. Sa femina iat decidiu de ddu carragiati aici sa matessi dì chi “Antoni” est mortu.
Tandu, in custa chistioni, imbucant is specialistas de su RIS de Casteddu chi, a pustis is studius de su DNA, pigau de su cinisu e postu a cunfroma de cussu de is parentis ponint s’acabu a custu contu: su cinisu est cussu chi abarrat de Cuiricu Carta.
Màuru Mura
Giobia, su seixi de martzu de su 2023
Foto: https://www.castellinotizie.it/2023/02/01/sparatoria-ad-alatri-proseguono-le-indagini-dei-ris-individuate-impronte-di-scarpa-nel-vicino-campo-di-basket/
