Sa saludi de Gratzianu Mesina, chi s’agatat impresonau in sa galera de Opera in Milanu, funt sempiri peus e a si sanai in presoni etotu no est cosa chi si possat fairi. Ddu scrint, in paperi, is abogadas suas, Beatrice Goddi cun Maria Luisa Vernier, in d’una litara presentada a su tribunali de Sorvegliantzia de Tatari, acapiendu, a sa litara, fintzas totu sa documentatzioni de is dotoris. Sa Goddi cun sa Vernier pedint chi Gratzianeddu, chi tenit otant’annus, bessat de presoni e paghit sa cundenna sua o in domu sua in Orgosolo o in calencun’atru logu prus addatu.

Eris s’atobiu de unu po custa pregunta: su tribunali, ghiau de Giomaria Cuccuru, po biri chi de averas is cunditzionis de saludi de su bandiu prus famau de Sardigna funt aici postas mali, at decidiu de ponni un’espertu po cicai de biri chi is abogads tengiant arregioni. Galu non si connoscit chini at essi e s’incarrigu ddu at a donai in su atobiu de dus chi est giai postu po su dixiaseti de su mesi de Sant’Andria. S’arriolu prus mannu est su coru de Mesina, chi in cust’urtimu annu est sempiri andendu peus po mori de s’idadi e de sa vida chi fait in presoni. No est chi possat sartai de orroca in orroca comenti faiat candu fut bandiu, immoi est frimu comenti si podit essiri sendu presoneris.

Finas a su mesi de triulas Gratzianu Mesina s’agataiat in su presoni nugoresu de Badu ‘e Carros – aunia ddu iant serrau de fatu ddu airi acapiau in su mesi de idas de su 2021, in segus chi si fut fuiu po unu tempus de un’annu e mesu. De triulas est in Milanu e parit tropu atesu de cussu chi est s’ambienti chi at sempiri biviu.

Mesina non si fut fatu agatai de su dus de triulas de su 2020, pagu a innanti chi is carabbineris furint andendu a nde ddu pigai in domu sua in Orgosolo po dd’amostai sa sententzia finali de sa Cassatzioni chi ddu cundennaiat a trint’annus de presoni, chi dapoi furint calaus a binticuatru. Sa cundenna fut lompia po airi postu in peis una truma de genti po bendiri droga. Po un’annu e mesu si fut pensau ca si fut fintzas mortu, ma a pustis is Carabbineris de su Ros ddu ian agatau e acapiau in una domu de amigus suus in Desulu, sempiri in provincia de Nugoro.

 

 

Màuru Mura

 

 

Cenarba, su 23 de cabidanni de su 2022

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

Foto: https://www.teleclubitalia.it/chi-e-graziano-mesina-il-latitante-piu-pericolo-ditalia-catturato-dopo-un-anno-di-fuga/