Sighit su indagu de sa giustissia in pissu de sa genti chi at agiudau su boss mafiosu Mateu Messina Denato, acapiau in su mesi de gennargiu in sa clinica La Maddalena de Palermo. Is carabineris de su Ros ant acapiau eris, po airi agiudau su boss candu fut bandidendu, Emanueli Bonafede, nepodi de Messina Denaro, e sa pobidda Lorena Ninfa Lanceri.

Po is indagadoris, is dus iant airi portau su boss “de sighiu e po dis medas” in sa domu insoru de Campobello de Mazara aunia andaiat finas a prangiu o a cena e bessiat de custa domu agiudau de pobiddu e pobidda chi castaiaint beni chi in is orus s’agataiant carabineris o politziotus.

Bonafede cun sa Lanceri – po cussu chi at scritu su Pubricu Ministeru – iant airi donau ospitalidadi a Messina Denaro e non ddi faiant mancai nudda. Lorena Lanceri, in prus, sempiri po is indagadoris, fut una de is medas chi portaiat is cumandus de su boss a atras personis, bofias beni de su boss, e fut apicigada meda a su boss e totu.

“Una de is cosas prus bellas de sa vida mia est cussa de t’airi atobiau, comenti chi su distinu at decidiu de pediri perdonu, fendumì un’arregalu mannu. Cussu arregalu ses tui”, iat scritu sa femina in d’unu billetu po Messina Denaro. In prus de essiri nebodi de su boss de Campobelli, Emanuele Bonafede est fradi de Andria, su geometra de Campobello chi iat “donau” s’identidadi a Messina Denaro, acapiau in is cidas passadas po sa curpa de s’airi fatu fairi is arretzetas de su dotori Arfonsu Bonafede.

Po immoi, tandu, funt in ses is acapiaus po airi agiudau Messina Denaro candu fut bandidendu. De s’acapiu de su boss mafiosu funt acabaus in presoni Giuanni Lupino, s’autista chi ddu acumpangiaiat a sa clinica La Maddalena de Palermu, Andria Bonafede, su fradili chi portat su matessi nomini, su fradi Emanuele e sa pobidda Lorena Lancieri, e Arfonsu Tumbarello, su dotori chi sighiat Messina Denaro. Funt incurpaus, chini de prus e chini de mancu, de associatzioni mafiosa e dde agiudu a unu bandidu.

 

 

 

Màuru Mura

 

 

Giobia, su seixi de martzu de su 2023

 

 

Foto: https://www.ilmeteo.it/notizie/matteo-messina-denaro-nominato-lavvocato-dufficio-rinuncia-allincarico-e-ci-che-accade-dopo-assurdo-080453