Candu sa Torres si dda giogat foras de domu arregalat sempiri spantus, ma massimamenti puntus grais, a is tifosus. Difatis, a pustis cincu partidas giogadas a tesu de su Vanni Sanna de Tatari, custu si podit abogina ca nd’at bintu cuatru. Feti cun su Pescara at pigua unu puntu in sa prima giornada de campionau, in segus a bintu su 14 de cabidanni cun su Campobasso (0-1), cun su Sestri Levante (1-2) su 24 sempiri de cabidanni e cun su Gubbio (1-2) su 28 de cabidanni. Eris est sussediu su matessi in Pontedera po 2-3. Grai a beru custa vitoria, poita est lompia a pustis chi is sassaresus funt perdendu a innantis po 1-0 e dapoi po 2-1. Est a nai finas ca sa scuadra toscana est abarrada in dexi po mori ca s’arbitru c’at stupau a Martinelli a s’acabbu de sa parti de unu de sa partida. Protagonista mannu de sa cuntierra intru de is duas scuadras est stetiu Adama Diakite chi, postu in campu de su cumentzu, at fatu dus gol de conca, in su mentris chi su gol de su 2-2 ddu at fatu Mastinu.
Su Pontedera, chi biat setziu in panchina s’allenadori nou Lionardu Menichini (chi fut su numuru dus, a is palas de Mazzone, in Casteddu e allenadori beciu de sa Torres in su 2005) est stetiu perigulosu in sa parti de mesu de su primu tempus cun dd’unu corpu de conca de Corona chi nd’at boddiu su palu e dapoi a pustis cincu minutus at segnau cun Ianes. Un’atru palu po is toscanus cun Ragatzu (su matessi chi giogaiat ocannu passau cun s’Olbia) a su minutu de 36. Sa partida mudat caminu candu s’arbitru ci stupat a Martinelli. E difati, a innantis de andai a si pasai, Diakite ce dda fait a paregiai is contus.
In sa parti de dus su Pontedera torrat a segnai cunu dd’unu rigori de su matessi Corona, ma inderetura is torresinus agatant su 2-2 cun Mastinu. Si cumprendit beni ca sa Torres bolit pigai is tres puntus e no dd’acabbat de atacai e su gol de su giumpamentu lompit a su minutu de 74 cun dd’unu atru corpu de conca de Diakite. Immoi sa Torres s’agatat a 18 puntus in classifica a si palas de sa Ternana, su Pescara (chi a dogna manera depit cuberai una partida) e sa Virtus Entella chi ghiant cun 20 puntus.
Màuru Mura
Lunis, su catodixi de Mesi de talamini de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.youtube.com/watch?v=neXXt529_Oo
