Finas “Chi l’ha visto” s’at intregau sa chistioni de Karol Canu e Giusepu Contini, is dus piciocheddus de Terranoa sparessius de una cida a custa parti. E in s’acabbu de sa puntada funt lompius de calencunu amigu signalis de importu, totus de biri, ma chi podint donai a chini est sighendu su contu unu caminu eretu.
“Chi l’ha visto” eris est imbucada in domu de Canu, aunia ddue furint sa mama Giulia, sa sorri Crara Baroni e Antoneddu Contini, babbu de Giusepu.
Is dus piciocheddus, narat Antoneddu Contini, si connosciant de tempus pagu: “Si funt connotus a s’acabbu de ocannu passau, bessiant de tanti in tanti de tres cidas, bufaiant calencuna cosa e andaiant a giogai a biliardinu”.
Ambos, giobia passada, funt bessius chena pigai nudda e po custu si pensat chi non funt pensendu a si fuiri. “No at pigau mancu una tasca – contat Contini – Karol est bessiu chena pigai nudda, né bestiris, né tasca e nemancu su carriga baterias de su telefoneddu”.
Sa sorri Crara ponit in filera is signalis: Karol e Giusepu ddus ant bidus paris, giobia passada: “A is seti e mesu de merì in su parcu Fausto Noce, a is otu e binti in s’orruga de Aldo Moro in dd’unu stangu e intru de is noi oras in sa prassa Mercato”. Totu in sa normalidadi po is giovunus terranoesus. Su telefoneddu at scoviau, in segus, ca funt in is orus de sa scola agraria aunia is dus piciocus studiaiant, scola chi Karol boliat lassai. “Si podit partiri de innoi”, narat su babbu de Giusepu.
Sa sorri de Karol, giovana meda, in custas dis at chistionau cun is amigus de is piciocheddus: “Seus cichendu de andai a innantis, finas intru de is amigus de Karol e Giusepu, ma bieus ca totus timint de fueddai cun sa giustissia”.
“Chini scit calencuna cosa – funt is fueddus de is duas familias – nosi ddu nerit, finas abarrendu in s’umbra. Non depeis timiri, ma nosi depeis agiudai a cumprendiri su poita”.
Màuru Mura
Cenarba, su dus de friargiu de su 2024
Attività realizzata col contributo della Regione Sardegna – Imprentas 2023-2024.
Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.galluraoggi.it/cronaca/ragazzi-scomparsi-karol-giuseppe-olbia-30-gennaio-2024/
