Unu pipiu de cinc’annus, malaidu de talassemia, est su primu in Italia a airi erriciu un’organu de unu omini ancora biu, su babbu.
Totu custu est sussediu s’atra dì in su spidali Giuanni XXIII de Bergamo, aunia su babbu at “arregalau” una parti de prumoni a su figliu. Po sa matessi maladia, su babbu dd’iat arregalau su majoddu chi perou iat tentu una reatzioni – cussa chi benit tzerriada maladia de trapiantu contras su strangiu – cun sa cali is cellulas trapiantadas atacant is organus de su trapiantau. Po mori de custu su pipiu iat tentu unu dannu a is prumonis. Babbu e figliu immoi s’agatant ricoveraus e sa prognosi, is dotoris, si poderant po issus, ma parit chi tengiant fidi meda poita s’operatzioni est arrennescia.
“Est un’operatzioni dificili meda, fata in d’unu spidali chi tenit esperientzia manna po cantu pertocat is trapiantus po genti pitica de idadi e finas po cantu pertocat su prumoni. Totu custu nosi depit fairi cumprendiri ca in Italia seus a innatis meda po custas operatzionis”, narat su diretori de su “Centro nazionale trapianti”, Massimu Cardillo. “Tocat ancora a tenni passientzia manna – narat sempiri Cardillo – aspetendu chi su pipiu chi at erriciu e su babbu chi ad arregalau istint meglius, ma totu, si podit nai, est andenduru po cussu chi s’aspetaiant is dotoris. S’umperu de una parti de prumoni de su babbu de su pipiu, chi dd’iat giai donau su majoddu, est de importu mannu po unu ‘vantaggio immunologico’: in totu s’Europa funt paghissimus is trampiantus de custa manera, finas chi in Italia de dexi annus c’est una lei chi donat sa possibilidadi de donai in vida una parti de prumoni. Po custa operatzioni serbiat s’autorizatzioni de su ‘Centro nazionale trapiantati’”.
Po su diretori de su Cnt “sa spera est chi custa operatzioni tengiat vida longa po babbu e figliu e facat cumprendiri a totus s’importantzia manna de is trapiantus, chi siat biu o mortu. In Italia c’at genti meda chi est aspetenduru organus po sighiri a biviri”.
Màuru Mura
Giobia, su 19 de gennargiu de su 2023
Foto: https://unrespirodisperanzalombardia.com/osp-papa-giovanni-xxiii-bergamo/
