Partida de importu mannu cussa de cras a pustis prangiu po su Casteddu. Difatis lompit in sa Unipol Arena sa Salernitana, ghiada de sa panchina de s’allenadori beciu, chi no at lassau arregodus durcis, Fabiu Liverani. Sa Salernitana, in sa classifica de su campionau est s’urtima cun catodigi puntus e parit giai cundennada a ci calai in serie B. Ma Ranieri, in s’atobiu cun is giornalistas, cumbidat totu s’ambienti, a abarrai cun is peis beni prantaus in terra: “Funt urtimus in classifica, est beridadi, ma tenint ancora gana de si dda gherrai – narat s’allenadori romanu de su Casteddu –. Po cantu nosi pertocat depeus giogai cun crobba arta poita custa paritda est perigulosa meda”.
Est a nai ca s’urtima partida binta cun s’Empoli at arregalau meda a totu sa scuadra: “Eja, est beridadi finas custa – sighit Ranieri –. In Empoli eus cumprendiu, massiamenti ca gioghendu cun gana e barra podeus lompirti apetotu e binciri calencuna partida in prus de cussas chi eus bintu. De seguru, dapoi, is partidas si podint decidiri po calencunu episodiu. E de immoi a s’acabbu de su campionau podint essiri galu medas”.
Cras in su Casteddu ant a mancai giogadoris medas, prus che a totu in atacu. Difatis funt foras Pavoletti, Petagna e Luvumbo, in prus de Sulemana e Mancosu. Totu at a orrui in pissu de is palas de Lapadula. “Po mei cussu chi contat est chi calencunu facat gol. De seguru Lapadula ndi bolit fairi atrus, poita su gol po un’atacanti est sa vida sua. Ma non si depeus scaresciri ca teneus atras armas a dispositzioni, comenti Shomudorov chi est abili e Kingstone Mutandwa, unu piciocu giovunu chi mi pragit meda”, sighit a nai Ranieri.
Intantis su Casteddu est gioghendu de tres partidas a cust’ala cun cuasi sempiri is matessis giogadoris e cun sa matessi manera: “Custu non bolit nai ca apu postu a una parti sa manera de giogai chi eus umperau in is atras partidas. Immoi fut cussus chi mi funt pragendu de prus e tocat a sighiri in cust’andala. Ma tengiu atrus giogadoris, comenti de Prati e Viola, chi si funt frimaus unu pagu, ma chi funt torrendu in forma”.
Màuru Mura
Cenarba, s’otu de martzu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.dazn.com/it-IT/news/altro/come-e-dove-vedere-cagliari-salernitana-del-26112021-in-streaming/1bb59x24epzzq1h284rusywygj
