Cando duos poetas de virtude manna cantan manu-manu est raridade abberu chi sa gara non bessat bona. Cun tiu Peppe Sozu e Marieddu Màsala sas disputas in poesia tenian semper e in totue unu marcu distintu de calidade primarza. In custas 18 otavas esordiales, cantadas cun sa naturalesa de chie s’intregat a sa bonamuta, nde tenimus un’esémpiu jaru e nidu cun s’arréjonu friscu che abba de funtana de monte, nàschidu in su mamentu a iscàmbiu sighidu subra su tempus de su chelu, istrofa pro istrofa. Cando an fatu sa sa gara in S’Ulumedu tiu ’e Sozu teniat 77 annos e Màsaleddu 56.
- Sozu (
……………annos e piusu
chi S’Ulumedu in su palcu mi as bidu
cun mannos e minores mi as unidu
e mai mi so àpidu confusu.
Oe so imbetzadu e istasidu
ca su tempus sas foltzas mi che at tusu
ma isperende in s’azudu ’e Maria
ti salud’oe un’ateruna ’ia.
- Màsala (56”)
Pro s’invitu chi m’azis postu in manos
ringràtzio sa ’ostra cortesia
torrende a s’Ulumedu dae Silanos
ca est cussa sa cara pàtria mia.
Pro custa gara ’e sa festa ’e Maria
paret chi bos agate totu sanos,
chi non m’ingannet sa ’ostra aparéntzia
e retzide ateruna riveréntzia.
- Sozu (1’08”)
Fin tantos annos pastore e massaju
in pena ’e sa terrìbbile sicagna
ca de su sole allumadu ogni raju
fit sichende sos chercos in montagna
e oe invece su duos de maju
a unu mare ’e fangu est sa campagna.
Non b’at aficu in sa nostra regione:
o ch’at sicagna o ch’at alluvione.
- Màsala (44”)
Ma de it’amos a tenner paura?
Cantamos, Sotgiu, a s’ispensierada.
Pro chi sa note est male inchimerada
inoghe semus suta ’e cobeltura,
nos amos evitadu un’infustura
e nos faghimos una suerada.
Però ja semus in logu siguru:
como, si cheret, chi pioat puru.
- Sozu (1’03”)
In s’ijerru chi est tempus de traschia
totucantos timimos abba e fritu
ma oe de abberu non creia
d’esser in su salone in custu situ
ca no est tempus de iscuderia
e ne de fagher garas in s’abbitu.
Ma como a posta a Màsala e a Sotgiu
e a bois chilcadu an bellu apoggiu.
- Màsala (44”)
Ma bell’e gai no ti ses confusu
e declaradu as bene totucantu.
Chi non si nd’’idat sicagna piusu
ca de pane bisonzat unu cantu
e totu su chi falat dae susu
ammentadinde chi est donu santu
e lassa chi pioat in beranu
ch’in sas ispigas ammadurat ranu.
- Sozu (1’03”)
Ma a sos iscentziados de sa terra
su ch’an nadu e iscritu non peldono:
nachi sos elementos fin in gherra,
sas istajones ana nadu nono,
bennidu est su brutale efetu-serra
nachi timian su bucu ’e s’ozono.
Ma an isbagliadu totu in fundu e chima
torran sas istajones che in prima.
- Màsala (48”)
Però innanti fimis disperados
canta arsura in bacinos e in rios.
T’as a ammentare sos annos passados
s’aiscultas sos paragones mios
chi fimis totucantu imbenujados
invochende de abba sos butios.
Ma tue paret chi sos astros times:
como si non pioet non frastimes.
- Sozu (57”)
Mirende a Deus a ojos abbertos
ue che fit umpare cun Gesusu
si sun fina inchinados sos incertos
si calchi cosa b’aiat in susu
prite nos naraian sos espertos
chi nachi non pioiat piusu.
Invece ’enit su tempus adatu
e finamenta ’e abba nos at atatu.
- Màsala (42”)
At a pioer fina in su futuru
faghet che su presente temporale
ma non chelzo ch’abbascet su morale
ca si pioet su pane est siguru
pro chi nois bistemus mesu male
però sos Curdos bistan peus puru
ca sun a buca abbelta denutridos:
amméntadi ’e famidos e sididos.
- Sozu (54”)
No andes a chilcare sa pelea
ca famidos che nd’at unu fiotu.
Nois semus passende un’era fea
ma bonu e malu si ponet in motu
e si pensamos de sa terra intrea
nois non semus sos peus de totu.
Si miras sa terrìbbile piae
peus meda de nois nde at addae.
- Màsala (45”)
Mi’ chi nois non semus castigados
e dia cherrer chi non t’addolores
ca Deus fizos mannos ne minores
ja no nde lassat mai ismentigados.
Ammentadinde si los at criados
chi sun totu in sa terra abbitadores
e su Deus eternu faghet bene
fina a-i cuddos chi in issu non crêne.
- Sozu (59”)
Ma Deus cun sa sua maestade
bi penso chi nos est totu ’idinde
de sos chi immensa an sa propiedade
e si sun sempre pius irrichinde
poi unu tertzu de s’umanidade
sun ’ogni die ’e fàmine morinde.
Si isse est babbu ’e totu, ista seguru,
devet abbaidare a cussos puru.
- Màsala (41”)
Ma nois mortos non semus ancora
e mancu deo, Sotgiu, nd’apo gana
de bi andare a s’ultima dimora
pro cantu mala est sa vida umana.
Però, ammenta, s’abba pioana
ristorat totu su regnu ’e Flora.
De s’Ulumedu in sa festa ’e ocannu
mancu a sa poesia faghet dannu.
- Sozu (1’00”)
Chi s’abba non nos ponet a disagiu
naras, Mario, e non s’intendet “Ohi”.
Lu deves narrer dae como in poi
ca sun sempre sas nues in viagiu
e so pensende chi si sighit goi
ocannu nos guastat su foraggiu.
Elva meda nos batit de regalu
ma timo su foragiu chi ’essat malu.
- Màsala (40”)
Ma deo inoghe bene mi la passo
pro custa ricurréntzia festosa.
Si la diverto sa zente e l’ispasso
no ap’esser pensende a àtera cosa:
gai fato comente sos de Bosa
chi si pioet, pioer lu lasso.
Ancu pioat dinari e farina
ozu cun trigu e casu e binzina.
- Sozu (50”)
A da chi cheret fagher abba e bentu
bìntrande a intro si ti agatas fora
ca si ses in s’apogiu in sa dimora
s’at temporale l’afrontas cuntentu
ma forsi at preparadu s’argumentu
su comitadu de Nostra Signora.
Lassa sa terra asciuta o infusta
e serramos s’esórdiu cun custa.
- Màsala (52”)
E gai nde faghimos finitia
ma sa Madonna apemus a cumpagna,
gai inoghe ch’istamos de cucagna
e non namos ne pisti e ne titia
pro chi est beru chi sa poesia
li cunfaghet pius cand’est sicagna
e timet s’abba e su tempus nieddu
tantu non naschet che su cugumeddu.
Màuru Mura
Giobia, su 19 de gennargiu de su 2023
Foto: Archivio Domus de Janas
