Su misteriu in pissu de Pitanu Luperto at tentu un’acabbu e aici su giogadori est passau a sa Cremonese de s’allenadori beciu de su Casteddu, Davidi Nicola. Mancaiat feti un’ora a sa fini de sa fentana de comporas e Luperto si nd’andat po sempiri.
Su difensori centrali at bestiu po sa prima bia sa magligedda de su Casteddu in sa Coppa Italia su 12 de austu de su 2024, in sa vitoria po 3-1 contras de sa Carrarese. E sa dì iat finas passau sa bocia po unu gol. In su matessi campionau, est a nai cussu de su 2024-25 at finas segnau po sa borta de unu, in sa partida giogada contras de su Lecce, in sa Unipol Domus, binta po 4-1. Ocannu passau est stetiu unu de is giogadoris casteddaius chi at giogau de prus, donendu una grandu manu de agiudu po permmitiri a sa scuadra de si sarvai. In sa prima parti de custu campionau at giogau po dixiannoi bias, fendu finas unu gol in sa prima partida contras de sa Fiorentina. Partida in segus acabbada po 1-1.
“Esempiu mannu de agiudu mannu – si ligit in su giassu de su Casteddu – personalidadi positiva a intru de sa truma, lassat su Casteddu a pustis airi giogau po cincuantotu bias. Su Casteddu ddi torrat gratzias po totu cussu chi at fatu, in campu e foras, in su caminu cun sa magligedda orrubia e asula. Totu sa familia de su Casteddu dd’augurat totu su meglius po su benidori. Gratzias de coru e bonu sighimentu de carriera, Lupo!”.
Po s’orrestu de is comporas e de is giogadoris bendius, in custa fentana, a su Casteddu funt lompius Sulemana de s’Atalanta, Dossena de su Como, Albaraccin de su Boston River e Reterink de su De Graafschap. Si ndi funt andaus Radunovic a su Spetzia, Rog abarrau chena de cuntratu, Prati a su Torinu, Luvumbo a su Maiorca e Luperto, comenti eus nau, a sa Cremonese.
