Totu comenti in d’unu film. A pustis airi cumpudau sa domu aunia at biviu, sonumancu de ses mesis, Mateu Messina Denaro in Campobello de Mazara, eris is indagadoris ant scobertu un’atru logu aunia s’atacaiat. Non si biat, ca fut in palas de un’armadiu prenu de bestiris: non ddue fut ne letu e nemancu atrus mobilis, su boss ddu iat fraigau po atacai beni is cosas suas.
Prendas comenti collanas, bracialis, perdas pretziosas e de prata ant agatau is investigadoris chi immoi ant essi peritziadas po cumprendiri cantu possant balliri.
Carabineris e Gico de sa Finanza ant postu menti a is bogis chi ddis funt erribadas: unu “bunker” chi s’agatat in d’una palatzina, sempiri de Campobello de Mazara, chi est atesu nemancu de unu chilometru de sa domu aunia biviat in orruga Santu Idu, comporada de Andria Bonafede, cun su dinari de su boss mafiosu.
Ant agatau finas scatulas prenas de paperis, chi immoi is carabineris de su Ros funt studiendu, atras scatulas funt sbuidas: probabili meda chi calencunu ddas at libertas a pustis chi Messina Denaro est stetiu acapiau.
S’allonghiat, intantis, sa lista de is ominis chi ant agiudau Messina Denaro. In prus de Giuanni Luppino, chi ddi faiat de autista e ddu at acumpangiau in sa clinica Maddalena, funt indagaus Andria Bonafede, su geometra de Campobello chi at comporau sa domu e dd’at donau s’identidadi sua, e dus dotoris. Unu de custus est de Trapani, Filipu Zerilli, primariu de oncologia: issu est stetiu cussu chi at fatu s’esami de su dna a su boss chi ddi serbiat po ddi donai sa chemioterapia. S’atru est Arfonsu Tumbarello, su dotori de Castelvetrano in pensioni de tempus pagu, chi ddu teniat in cura.
Serrau in su presoni de L’Aquila, Messina Denaro at giai fatu is bisitas medicas. Arremonaus ca is dotoris ant nau ca su boss non podit tenni prus de tres annus de vida, ca est meda mali pigau de su cancru e at a fairi sa chemioterapia in presoni etotu.
Po s’ora non si connoscit candu Messina Denaro at a arrespundiri a is preguntas de sa procura. Po immoi at atobiau feti su procuradori capu de Palermu Mauritziu De Lucia feti po calencunu minutu. “Dd’apu atobiau e dd’apu nau ca immoi est in is manus de su Stadu – at nau De Lucia – e dd’apu finas e nau ca at a tenni s’assistentzia de is dotoris. At torrau gratzias”.
Màuru Mura
Giobia, su 19 de gennargiu de su 2023
Foto: https://www.ansa.it/sicilia/notizie/2023/01/18/individuato-il-secondo-covo-di-messina-denaro_533bffba-a691-47f9-b6c7-1065aa503e8e.html
