Su tempus de immoi no est de is meglius po su fubalu italianu. Sa Natzionali de is mannus est de tempus meda chi non si giogat is mondialis, cussa a suta de bintun’annus nd’at pigau una batosta in is urtimus campionaus europeus. Po non chistionai de is scuadras, s’Inter, sa Roma e sa Fiorentina, chi finas chi funt lompias in is finalis, ant perdiu chena farta peruna. O depeus castiai is giogadoris meglius chi si ndi funt andendu in is atrus Stadus aunia ddus pagant de prus?

Una spera de eriseru, po su benienti, s’est fendu caminu: sa Natzionali de is piciocus prus piticus de bint’annus at bintu is Mondialis, a pustis bint’annus de s’urtima borta, bincendu contras de su Portogallo po 1-0

In su Stadiu de Ta’ Qali de Malta is piciocus ghiaus de Bollini, a pustis de sa semifinali binta cun suferentzia contras de sa Spagna po 3-2, est bessia in su pumu prus artu cun d’unu gol de conca de Kayode. Si ddu ant fatu bastai.

S’Italia est partia beni meda, atachendu is giogadoris lusitanus chi in sa partida de is gironis iant bintu po 5-1 contras de s’Italia e totu. Si cumprendit inderetura ca at essi un’atra partida e difatis, a pustis noi minutus, Esposito andat acanta de segnai. Gol, chi a dogna manera lompit a pustis de digiannoi minutus candu Kayode, cun d’unu corpu de conca, batit su portieri de su Portogallo. Po totu su primu tempus s’Italia giogat beni e at tentu sempiri sa bocia in is peis. In segus a su pasamentu, in su segundu tempus, su Portogallo cicat de si torrai a ponni in partida, s’acostiat a sa porta italiana, ma funt is piciocus de Bollini a s’acostiai de prus a su gol de dus.

A s’acabbu at chistionau su presidenti de sa Federatzioni, Grabieli Gravina: “Bincida chi fait sa storia. Is piciocheddus funt stetius bravus de averas, aici comenti s’allenadori Bollini e totus cussus chi ddu ant agiudau. Ce dd’ant fata a ndi pesai una truma forti e unia. Non fut facili a binciri custus mondialis ca ci funt scuadras prus fortis. Airi bintu est s’arrespusta prus bella a chini, chena connosciri su trabagliu mannu chi seus fendu cun is giovunus, preferit a nai ca totu andat mali e ca su benidori est nieddu che pigi”.

 

 

Màuru Mura

 

 

Lunis, su digiaseti de triulas de su 2023

 

 

Foto: https://gazzettadimalta.com/sport/calcio/un-gol-di-kayode-stende-il-portogallo-litalia-e-campione-deuropa/