Scrit in Facebook e “amelessat” s’assessorau de su Turismu de sa Regioni Sardigna “a non umperai mai prus s’imagini mia e cussa de su festival Time in Jazz. Poita cussu chi narat, de una Sardigna in s’istiu prena de musica (aici narat sa pubricidadi de s’Assessorau), non apicigat cun sa volontadi de dda sustenni”.
Totu cumentzat de sa pubricatzioni de is bandus po is tres annus, chi andant de su 2022 a su 2024. “A is cartellonis de is manifestadas de su spetaculu e de sa cultura – scrit sempiri su trombetista famau de Berchidda – funt donaus 400.000 eurus a s’annu cunfroma a is giai pagus 700.000 eurus de su famau “Click Day” de su 2020, po su cali, de fatu airi bintu is arrecursus a su TAR e a su Consigliu de su Stadu est, immoi, totu in is manus de unu comissariu “ad acta” postu de su Prefetu”.
“Cancellada sa manera umperada poita andaiat contras sa lei – sighit a scriri – at essi unu funtzionariu de su Stadu a donai is regulas noas de comenti donai su dinari. In su fratempus ocannu passau, cun sa pesta e cun totu is problemas chi giai connosceus, no est stetiu fatu perunu bandu, e duncas nudda finantziamentus, po sa cultura e po su spetaculu. Totu custu at bofiu nai ca is bilancius de is sotzius funt a terra e po non acabbai in custu campu s’est ‘umperada’ sa genti chi at tentu coragiu e onestadi”.
“Ma torraus a su bandu de immoi: ant postu a curriri 750.000 eurus po is cartellonis de is manifestadas de turismu ‘esperentziale’ e unu milioni in prus po sa cartellonistica de is manifestadas folkloristicas e de traditzioni. Non tocat a nosu nai sa balentzia de is manifestadas ne fairi is contus de cantus turistas portint a intru e a foras sa Sardigna. Iat essi una batgalia legia tra poburus – narat galu su jazzista – chi nos iat a ponni totus in guerra, e forsis una parti de sa politiga bolit propriu custu. Chi sa Sardigna est un’isola-continente, comenti iat scritu in is annus setanta Marcellu Serra, custa depit contai totu s’errichesa culturali e storica chi est fata de folklori e de traditzioni e in prus de cosas noas a passu cun su tempus. Podeus invecias chistionai de su pagu dinari chi benit postu a curriri e a is regulas, chi non si ndi cumprendit nudda”.
14 de triulas de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”
Foto: https://it.wikipedia.org/wiki/Paolo_Fresu_(musicista)#/media/File:Paolo_Fresu_Ibk.JPG
